April ni 18 Thawhtanni khan 9th Inter Branch YMA Cricket Tournament chu Suaka Cricket Stadium Sihhmuiah khelh chhunzawm leh a ni a, inkhel vawihnih awmin Ramhlun North Branch YMA leh Chanmari Branch YMA te chuan an khingpui ve ve hnehin quarterfinal an lut ve leh ta a ni
Inkhel hmasa zawkah Ramhlun North Branch YMA lam chu toss-ah chakin vawm hmasak an thlang a, an vawm tha hle over 19-an vawm meuh chuan Armed Veng Branch YMA te hian run 90 siamin an out vek a ni. Zarzova'n run 18-a siam tih loh chu midangin an contribute mang lova Ramhlun North lamah Lalnuntluanga chuan run 6 chiah pe in wicket 4-a la a, a vawm tha hle a ni.
Ramhlun North lamin an target 91 hi um huphurhawm takin lang lo mahse eng sports discipline pawh a tawh khirh em em thin Armed veng te pawn an khel tha hle a, over tawp ber thlengin an tang khawng tlat thung Ramhlun North lam hian an target 19.5 hi umpha in wicket 9-an hloh ve a, Ramhlun North tan hian bowling lama che tha tak Lalnuntluanga bawk a vuak lamah pawh a che tha leh a, ani hian ball 22-ah run 20-a rawn vaw chhuak ve a, Armed Veng vawmtu lamah Lalremruata chuan run 19 pe in, wicket 3-a la mahse an chak zo lo. Ramhlun North te hi wicket 1-in an chak a, quarterfinal an lut ve ta a ni.
Inkhel hnuhnung zawkah Chanmari Branch YMA leh Thingsulthliah Branch YMA te in hmachhawn leh in, Thungsulthliah Branch YMA in vawm hmasak an thlang a, wicket an la vat mahse batting line up thui tak leh experience ngah zawk Chanmari te insiam tha vatin Chanmari tan Lalfakzuala leh Zothantluanga ten run 43 leh 42 rawn siamin over 20-ah wicket 5 hloh in run 165 zet an rawn siam a, Thingsulthliah lamah Lalrinsanga chuan wicket 2 la in run 22 a pe ve bawk a ni.
Thingsulthliah hian target sang tak an um tih hriain run rate tih that ngai viau mahse Cricket-a veng hlun zawk leh player nei tha zawk Chanmari lamin harsatna engmah an tawk lova Thingsulthliah te hi over 18.3-ah vawm out vekin run 58 chiah an siamtir a, Chanmari te hian Thingsulthliah te hi run 103 zet an sawpin quarterfinal an lut ve nghal bawk. Thingsulthliah lamah Lallawmzuala chuan ball 36-ah run 20 siamin Thingsulthliah tan a, run vaw chhuak hnem ber a ni a, Chanmari vawmtu zingah Zoduhsanga chuan run 8 chiah pe in wicket 3-a la a, Lalthantluanga hian run 10 chiah pe in wicket 3 bawk a la ve a, an vawm tha duh hle a ni.
April ni 19 Thawhlehni Fixtutres:
09:00AM Luangmual vs Tlangnuam
12:00 PMRamhlun Venglai vs Thuampui