Valentino Rossi chuan Yamaha engine thar tur chu a belh chian tawh thu sawiin, tuna an hman mek nen a danglamna a tam loh thu sawiin, a phur loh thu a sawi.

Aragon Grand Prix an tlan zawh hnu khan Valentino Rossi chuan Yamaha khawl thar tur chungchang hi a sawi a. Aragon-a an chak zawh loh avang khan Yamaha chuan MotoGP khawvela chak hmel an hmuh loh rei ber tum an tawng a ni.

A hma deuhin Rossi hian Yamaha khawl chu a lo sawisel tawh a, khawl thar an hmang a nih loh chuan an tan chak ngaihna a awm loh thu a sawi chhuak a. Mahse, tuna khawl thar an siam a belh chian hnuah beisei ang a nih loh thu sawiin, an khawl hman mek nen danglamna a awm vak lo niin a sawi a ni.

Rossi chuan, “2019 engine tur chu vawi khat ka hmang ve chhin a, tuna kan hman mek nen hian danglamna a awm vakin ka hre lo a. Tuna mi hi tlemin an tidanglam hret chauh ni maiin ka hria a, hei hi an duhtawk mai loh ka beisei,” a ti.

“Khawl thar tur hi danglam dawrh ni thei se ka ti hle mai a, thu tawp siam mai loin an la siam that belh zel ka beisei hle mai a. Tuna mi pawh hi duhthu a sam lo em em a, team dang bike a pha lo lutuk tawh a, kan tan title lak ngaihna a awm lo a. Hei vang tak hian a aia tha daih hi an siam chhuah ngei ngei a pawimawh a ni,” a ti bawk.

A sawi zelnaah, “Tunhma kha chuan Brno test kha a kum leha bike thar tur kan enchhinna hun a ni thin a, mahse kum hnih kalta atang khan chutiang chu a awm ta miah lo mai a. Khawiah nge kumthara kan bike tur chu le? A nihna takah chuan kumthar atan eng vak mah kan enchhin lo a, ngaih a tha lem lo a ni,” a ti.

Eng ang bike nge a duh tia an zawhna chu chhangin, “Yamaha engineer te hi thu pe tur ka ni lo a, ka tih ve theih ber chu tuna kan khawl that lohna nia ka hriat te, harsatna awm mek sawi chhuahte hi a ni a. Ka duh duh ka phut ve ngawt thei lo a ni,” a ti.