​Xhaka hian zah a phu: Vieira

13th November 2019, 02:11PM

Arsenal captain hlui Patrick Vieira chuan Arsenal captain hlui ve bawk Granit Xhaka chu a khawngaih thu a sawi a, Vieira hian Xhaka chuan zah a phu thu a sawi tel bawk.

Kum 27 mi Xhaka hi thla hmasa tawpa Crystal Palace nen an inhmachhawn tumin Arsenal supporter-te lakah mawi lo takin a che a, hemi hnu hian a captain nihna pawh hlihsak niin tun thlengin Arsenal tan a la inlan leh lo.

Arsenal manager Unai Emery chuan Xhaka hian Arsenal tan a khel tawh lo maithei tih thu a lo sawi tawh a, Xhaka hian thupha pawh chawi tawh mahse boruak a tha tak tak thei tawh dawn lo ni pawhin a lang mek.

Arsenal ropui ber laia an captain Vieira chuan, “Xhaka hi ka khawngaih em em a, Arsenal captain a ni thina, tunah hian hun harsa tak a paltlang mek a ni. Arsenal tana a lo tih tawh zawng zawng hi kan theihnghilh loh a tha hle a, zah a phu ngawih ngawih a ni.

“Player kan niha, mi te’n min beisei anga kan khelh loh bawk chuan mahni hian hrehawm kan ti em em a, heti ang dinhmuna kan awm hian kan inchhir lehna tur thil sawi emaw tih emaw a awl em em bawk. Player hlui thenkhat te’n Xhaka an bei zui chiam kha tha ka ti lo hle a, a chungchang kha a tha lo lamin, na tak tak an sawi a, a pawi ka ti hle.

“Xhaka hi player tha a nih zia kan hria a, pachang tak a nih avangin he hun harsa tak pawh hi a paltlang ngei dawn tih ka hria a, player tha a nih angin player tha a nih zia a lan tir dawn a ni,” a ti.

Copyright © inkhel.com 2024. All rights reserved.