Unai Emery chuan Granit Xhaka chu Arsenal tan a inlan tawh lo maithei niin a sawi a, January thlaa chhuahtir chungchang an sawi ri tan niin a sawi.
Switzerland midfielder Granit Xhaka chu October 27 a Crystal Palace nen an inkhelh tuma a chet dan avangin captain nihna an hlihsak zui a, hemi hnuah hian Arsenal tan a khel zui leh tawh rih lo bawk a ni.
Zaninah hian Arsenal chuan Leicester City an tlawh dawn a, hetah hian Xhaka hi a tel ve dawn lo a, manager Emery chuan a hnuah pawh a tel lo chho zel tawh maithei niin a sawi zui a ni.
Kum 27-a upa Xhaka hi Switzerland tan inkhel turin an ram lamah a haw ang a, hemi hnuah pawh hian Emery chuan a chhawr zui dawn leh dawn loh a hriat loh thu sawiin, tun thla tawp lamah Arsenal leh Southampton inkhelh hunah pawh a chhawr kher a rin loh thu a sawi a ni.
Emery chuan, “Granit Xhaka hian kan club tan a khelh zui dawn leh dawn loh ka hre lo a. A rilru a siam fel a, Arsenal tana thahnemngai taka thawh zui zel a la duh tak tak a nih chuan ngaihtuahna thar kan la hmang leh ang,” a ti.
“Amah a inhuam a, he club tana theihtawp chhuah zel a duh tak tak a nih chuan kan tan thil lawmawm tak a ni ang a, amah ang player thiam chu kan la mamawh reng dawn a ni,” a ti bawk.
A sawi zelnaah, “Tun dinhmunah chuan Granit chinchang hi kan chhui zui zel a pawimawh hle a. A rilru put hmang te a thlak danglam a, a nungchang te a thlak thei a nih chuan a lawmawm viau dawn a ni,” a ti.
Xhaka a chhawr dawn rih lo a, Dani Ceballos chu a inhliam ve bawk avangin Unai Emery chuan midfielder pahnih chhawr theih loh a nei ta chu a ni mai a. Leicester khelmualah an tan chak ngei a pawimawh dawn a, squad chhah tha tak an neih theih loh chuan rilru a buai ve viau dawn a ni.
Arsenal manager Emery chuan, “Tunah tak chuan midfield lamah Xhaka tel lo hian kan phuisui lo zawk tih chu a chiang reng a. Tunah hian November thla a ni mek a, Xhaka hralh chhuah chungchang hi ka la ngaihtuah thleng vak lo a. November leh December thla chhungin match eng emaw zat khelh tur a la awm dawn a, mihring kan la inmamawh chho dawn chauh a ni,” a ti.