Barcelona captain Xavi chuan La Liga match hnuhnung ber khelin Spanish Football a mangtha chho mek. Barcelona tan game 505 lai a khel ta, tun season zawh rual hian Xavi hian Qatar club Al Sadd a zawm dawn tih a sawi chiang tawh.

Kum 17 chhung zet Catalan club tan khelin Camp Nou-a a awm chhung hian trophy 23 lai a la hman. 1996 atanga 2000 chhung khan assistant coach niin tuna Chelsea manager Jose Mourinho hian Xavi hi a lo enkawl ve hrep tawh. Mourinho chuan Xavi chu Ballon d'Or phu a nih thu a sawi chhuak.

"Thinlung takin Xavi hi thunhnai football khawvelah chuan khawvela player tha ber pakhat a ni chiang mai le. A career-ah hian Ballon d'Or vawi khat tal dawn chu a phu chiang a ni," tiin a sawi.

2014-15 La Liga Champions Barcelona hian treble theihna chance tha tak an nei mek a, Copa del Rey final an lut a, Champions League final-ah Juventus nen Berlin-ah an inhmachhawn dawn. Barcelona hian kumin hian an treble a nih chuan Xavi hi Barcelona-a a awm chhungin vawi hnih lai Treble champion a ni dawn tihna a ni.

Barcelona-in Camp Nou-a chelh duh hle mahse Xavi hian Football khelh zel a duh avangin Qatar lam a pan thu a sawi a. League hniam lama hahdam zawka khelh a tlin tak thu sawiin, engtikah emaw Barcelona-a a kir leh tur thu a sawi a, hetah hian player ni tawh lovin coach ang zawnga lut tur niin khawvel chuan a ring nghal a ni.