Paige VanZant chuan eng tikah emaw UFC kalsana WWE lama luh a rilruk thu sawiin, Stephanie McMahon nen pawh a thuphungin an inbe tawh niin a sawi.

American mixed martial arts fighter Paige VanZant chu Jessica Rose-Clark nen an inbeih tumin a ban ruk a tliak a, kum khat vel a chawlh hnuah kum thar January thlaah UFC lama kir leh a tum thu a sawi a. Hmeichhe flyweight division lama rank 15-na VanZant hian UFC chawlhsan chu a la rilruk chiah loh thu sawiin, a chawlhsan hunah chuan WWE lam pan a duh thu a sawi a ni.

Kum 24-a upa VanZant hi la champion lo mahse UFC chawlhsan chu a la rilruk bik lo a. WWE khawvel chuan a hip viau thu sawiin, octagon a kalsan hunah chuan wrestling khawvela zuan luh chu a hreh loh thu hi a sawi chhuak.

Paige chuan, “Tunah hi chuan UFC chhuahsan hi ka la duh rih lo a, professional fighter nih hi nuam ka la ti a, hmabak eng tak ka la nei bawk a. WWE hi an inkaihhruaina a tha hlein ka hria a, infiammi tan phei chuan luhna chi tak niin ka hmu a, ka tel vena atan chuan duhthusam a ni,” a ti.

“A hma daih atang tawhin an thil tih hi ka ngaisang a, min hip thei hle a. An zinga tel ve theih chu thil chakawm tak niin ka ngai,” a ti bawk.

VanZant hian WWE Chief Brand Officer Stephanie McMahon chu Portugal rama Web Summit neihnaah a lo hmu tawh a, hun rei vak lo chu an inbia tih sawiin, nakin zela inzawm theih dan tur pawh an sawi thuak niin a sawi.

RAW Women’s Champion Ronda Rousey hnung a zui hma hian Paige VanZant chuan kum thar January 19 a ESPN+ Fight Night a Rachael Ostrovich nen an inhmachhawn tur chu a thlir hmasak phawt a ngai a ni.

A ban ruh a tliah hnua a vawi khatna atan training a zawm leh dawn hnai a, thla thar atang hian training chu nei chho tura beisei a ni a. A ban chu vawi hnih ngawt an zai a, tunah chuan Octagon luhchilh leh tan thei tura ngaih a ni.