10 May 2019 05:52

inkhel

WWE hi a lem nge a tak?

Infiamna pangngai anga chhiar ni chiah si lo, khawvel hmun hrang hranga lawm hlawh em em mai WWE chungchangah mi tam tam an inhnial fo a. Thenkhatin a lem mai mai an tih laiin, a lem vek a ni bik lo tia tang tlat an awm ve bawk a. WWE chungchang tlem han thlir kual zuai zuai ila.

WWE hre chiangtute chuan a lem chu awm ve bawk mahse, a vai chuan a lem vek a nih bik loh thu an sawi a. Hetiang boruak karah hian a ngainatute zingah a tak tak a nih ring tlattu an la awm ve teuh a ni.

He infiamna hi a dang ang chu a ni lo chiang a, infiamna a nih rualin ennawm atana an buatsaih a ni bawk a, hei hi thil dangte nen a inan lohna lai tak chu a ni.

A lem nge a tak?
WWE huang chhunga thil zawng zawng chu a lem vek nia sawi a tam hle a, an thil tih reng reng chu chan chawp a nih thu an sawi nasa hle. Hei hi a dikna chen a awm tho rualin, a vai chuan a ni vek bik lo a ni.

Ring chhunga wrestler te chet dan chu a lem tam tak awm mahse, an inkhawih fuh ve tak tak thin a. A zavai chuan inkhawih na vek lem lo mahse a entute tana a hmuhnawm lehzual nan an inkhawih fuh fo a, thenkhat chu na ve deuh te pawh a awm thin.

Eng emaw changa na deuh hleka an inkhawih fuh hian entute chuan a lem a nih an rin loh phah ve fo a ni.

Ziah chawp vek
Inbei tur an ruat hnuah an inbeih dan tur chu an ruahman lawk vek a, a script an ziak lawk vek thin niin an sawi a. Hei pawh hi a dikna chen a awm rualin, a vai chuan a dik vek bik lo a ni.

Result chu a hma daihin an ruahman lawk thin a, a chak zawk tur an tifel thlap phawt a, chumi hnuah ring chhungah an inbei thin a. Ring chhunga wrestler te chet dan leh an inbeih dan vel chu sawi lawk em em a awm vak lo a, ring chhunga inbeite chungah a innghat a ni.

Thisen lem
Thawk khat lai khan WWE khawvelah thisen lem an hmang nasa thei viau a, tun hnuah erawh an ching tawh hran lo a. A hma kha chuan damdawi mum ang deuh, a chhunga thisen lem awmna chu an pai ru thin a, hei hi an hmet keh a, an taksa chu a thi angin a lang ta thin a ni.

Tun hnuah chuan wrestler te thi a chhuak a nih chuan an thi tak tak zel a. A hma anga thisen lem pai ru tawh loin, hmanraw hriam deuh hlek, blade emaw, thil dang eng emaw an pai ru tawh a, a chang chuan referee-in a lo pai ruk chu a pe thin a ni.

Wrestler te chuan blade emaw, thil hriam dang emaw hmangin an taksa khawi lai emaw chu an tipem a, thisen tak tak a chhuak thei ta thin a ni.

An inchawi kan dan
Wrestler te chuan wrestler dang lian pui pui chu anmahni chauhin an chawi kang lawp lawp zel a. Hetiang hi nunphung pangngaiah chuan thil theih loh tluka ngaih a ni a, a theih a nih pawhin a nazawng tih theih thil a ni lem lo.

Entirnan, The Undertaker chu palian tak, chak ve thawkhat deuh ni mahse, amah chauh chuan The Big Show te ang palian lutuk chu chawi kan chi rual a ni lo a ni.

Mahni rihna ang vela rit, len zawng pawh inang deuh thuakte chu wrestler te chuan duhtawkin an chawi kang thei a. Hetianga an chawi theihna chhan bulpui ber chu an chawi turte khan a rukin an lo puih thin vang a ni a. An khingpuite’n an chawi kan dawn khan langsar lo deuhin an lo zuang kang ve thin a, khatianga an tih khan anmahni chawi turte tan a awlsam phah vek tawh mai a ni.

Referee te chanvo
Wrestler te chu ring chhungah an duh ang takin an tal thin a, mi tam tak chuan referee te chu dan kengkawhtu, thutlukna pawh siam theitu ber niin an ngai thin a. Hetiang hi a ni vek kher lo thung.

Referee te kutah hian thuneihna tam tak a awm rualin, anni pawh wrestler te ang deuh bawk an ni ve a, lem an chang nasa ve hle tho a. An bengah hian ri hriatna an vuah a, chumi kaltlang chuan hmun dang atangin thuneitute’n thil tih dan tur an lo hrilh chawp nasa thei hle a. An hrilh dan ang zelin dan chu an kengkawh mai thin a ni.