The Bella Twins tia hriat lar, Nikki Bella leh Brie Bella te chu kuminah WWE Hall of Fame a lak luh an ni dawn.

Nikki Bella leh Brie Bella te hi WWE huang chhungah chuan hmeichhe zinga langsar berte zinga mi an ni a tih theih a. Anni bakah hian Class of 2020 zingah hian Batista, Hulk Hogan, Scott Hall, Sean Waltman leh Kevin Nash te pawh Hall of Fame-ah hian an la lut dawn bawk a ni.

WWE Hall of Fame an kal thlen hma hian Nikki leh Brie te zinkawng hi a thui ve hle mai a. August 2008 ah khan Brie Bella chuan entertainment wrestling hi a luhchilh tan a, ring hnuaiah Nikki chu a lo biru thin a, an inthlak ru a, hnehna an chan theih phah fo thin.

A tir lamah chuan ‘Twin Magic’ tia hriat an ni thin a, April 2011 ah khan Brie Bella chuan Eve Torres hnehin championship gold a la a, WWE Divas Champion a nih theih phah a. Kum khat hnuah Nikki chuan Beth Phoenix hnehin WWE Divas Champion a ni ve leh a. Hemi hnu, Survivor Series 2014 ah Nikki chuan title a la leh bawk a, AJ Lee chu hnehin ni 300 zet chu title hi a kawl a, Divas Championship chanchinah chuan title kawl rei ber a ni.

Wrestling khawvelah hian The Bella Twins chuan mi chi hrang hrang an hmachhawn hman a, Charlotte Flair, Sasha Banks, Becky Lynch, Stephanie McMahon te an hmachhawn mai bakah anmahni pahnih pawh an inhmachhawn tawh bawk a ni.

An pahnih hian reality show ‘Total Divas’ tih leh ‘Total Bellas’ tih te chu an buatsaih a, an hlawhtling angreng hle nghe nghe a. Hei bakah hian YouTube channel an nei bawk a, tunah hian subscriber 2.6 million zet an nei tling tawh a ni.

Entertainment wrestling huanga an khawsak dan chuan khawvel a deng chhuak chiang bawk a, hei vang hian WWE Hall of Fame-ah pawh an lak luh dawn phah ta hial a ni. WrestleMania 36 chu a hnai tawh hle a, hemi an buatsaih kar, April 2 ah hian Class of 2020 te chu WWE Hall of Fame-ah hian an la lut ang.