Ronda Rousey chuan WWE a chawlhsan hunah fa neih ve a rilruk thu a sawi chhuak.

UFC fighter hlui Ronda Rousey chuan WWE huanga a tih tum a tih zawh hunah chuan chawlhsan a tum thu sawiin, entertainment wrestling a bansan hnuah fa neih lampang pawh a ngaihtuah ve tur thu hi a sawi a ni.

California atanga chawr chhuak Rousey chu 2017 khan UFC heavyweight champion hlui Travis Browne nen an innei a. Tun hnaiah khan Total Divas-ah chawlh a rilruk chungchang hi a sawi chhuak a ni.

“Ka awm zel dan tur chungchangah hian rilru ka siam tawh a, ka nun kawng zawh zel dan tur leh thil dang hrim hrimah thutlukna ka siam fel tawh a. WWE huangah hian hmeichhe dinhmun chawisan belh ka la tum a, theihtawp ka chhuah ang a, chutiang thil chu a thlen hnuah fa ka nei ve tawh ang,” tiin Rousey chuan a sawi.

Wrestlemania 35-ah khan Ronda Rousey hi Becky Lynch nen an inhmachhawn a, anni hian boruak an siam hle a, hemi tuma inbei zingah chuan thawm nei lian ber an ni a. Kum 35 chhung zet WWE awm tawh hnuah hmeichhe pahnihin thawm an neih len ber tum a la ni.

Rousey chuan, “Mak tak maiin ka tih tur hi ti zo tawh nia inhriatna ka nei a. Wrestlemania hnuah khan fa neih lampang kan ngaihtuah ve tawh dawn emaw ni tih te kha ka ngaihtuah a ni,” a ti.

Kum 32-a upa Ronda Rousey hian UFC huangah boruak a nei tha chho hle a, helam hi chhuahsanin 2014 kumah khan WWE lam hi a pan a, a che fuh chho zel a ni.

Olympic judo athlete niin Rousey hian bul a tan a, 2004 kumah khan USA aiawhin Athens Olympics-ah a tel a, Olympics-ah chuan judoka naupang ber a la ni nghe nghe a ni.

2004 kumah hian Budapest khawpuiah World Junior Judo Championships gold medal a la a. 2008 Beijing Olympics-ah khan an ram aiawhin a tel ve leh bawk a, 2010 kumah UFC huangah a lut tan a ni.

WWE a luhchilh hnuah 2018-19 ah khan Raw Women’s Champion niin, champion rei thei ber a ni a. A title kawl chu Becky Lynch chuan a laksak a ni.