Thawhtanni zing khan Newark, New Jersey(USA)-ah WWE event Backlash a chhuak a, main event-ah Roman Reigns-a chuan Samoa Joe chu a hneh a, match langsar dangah Aj Styles, Seth Rollins, Jeff Hardy, Nia Jax leh Carmella-i te chuan an title belt theuh an kawl zui bawk.

Seth Rollins(Intercontinental Champion) def. The Miz(via pinfall)

He match hian ngaihven a hlawh hle a, main card opening match-ah dah a ni a, mipui lam pawhin hmuhnawm an ti hle. Champion Seth Rollins leh champion hlui The Miz-a te hian chak an tum dun hle a, The Miz-a'n vawi hnih lai a finishing move hnuah pawh champion lai Seth Rollins a tlawm thei lo. A tawpah erawh nalh takin Rollins-a hian a finishing move lar tak curb stop hmangin hnehna a chang ta zawk a ni.

Nia Jax(Raw Women's Champion) def. Alexa Bliss via pinfall

Mipui lamin an nghakhlel tawh hle a, technical wrestler leh brute force wrestler inbeihna te pawh a tih theih ang. Champion hlui Alexa Bliss-i hian a thiam thil hmangin hneh a tum hle tih a hriat. Chutih laiin champion lai Nia Jax-i tharum ngahna erawh a ngamlo a ni deuh ber. Match rei tak an khelh hnuah champion lai Nia Jax-i chuan a finishing move Samoan Drop-in hnehna a chang ta zawk a ni.

Jeff Hardy(U.S Champion)def. Randy Orton via pinfall

Championship match hmuhnawm tak tura beisei a ni a, wrestler tawnhriat ngah tak pahnih inbeihna a nih angin a nep thei lo. World Champion hlui Randy Orton-a chuan Jeff Hardy-a chu nalh takin a DDT hnuah a finishing move R.K.O-in tlawm ngei a tum a, nimahsela Jeff Hardy-a hian a tawnhriat hmang tangkaiin nalh tak maiin a finishing move pakhat zawk Twist of Fame hmanga a counter hnuah Swanson Bomb-in a chhunzawm nghal a, bawhbet zui nghalin chak zawkah puan a ni zui bawk.

Daniel Bryan def. Big Cass via submission

Mi tam tak phei chuan Davida leh Goliatha inbeihna ang hialin an sawi a, beisei ang ngeiin a hmuhnawm chiang e. Technical wrestler Daniel Bryan-a hian a tir lamah chuan a nawr hle a, nimahsela an inpawmchilh erawhin Big Cass-a hian a sawp nasa thei hle. Tawnhriat ngah zawk Daniel Bryan -a erawh a tawpah submission-in a chak zawk ta thung zawk.

Carmella(Smackdown Women's Champion) def. Charlotte Flair

Champion hlui Charlotte Flair-i chuan champion leh ngei a tum hle a, a duhthusam erawh a thleng ta lo. He match-ah hian champion lai Carmella- i hian tlanchhe chungin amah chotu Charlotte-i lakah wrestling game a khel a, nimahsela a duh angin a game plan a hmang thei meuh biklo a ni ber. He match hmuhnawm takah hian Charlotte-i hi chak mai tura a lan laiin a inhliam hlauh a, champion lai hian remchang ah hmangin chiang zetin a kick fuh a, pinfall-in hnehna a chang zui.

Aj Styles(WWE Champion) vs Shinsuke Nakamura, Draw)

Wrestler tha inbeihna a ni dawn a, hmuhnawm tak tura beisei a ni. Wrestler pahnihte hian chak zawk an tum dun hle a, an duhthusam ang erawhin an che thei lo. Vawi tam tak an inbawhbet a, no disqualification match a nih angin phalloh a awm lo. Rei tak an inbeih hnuah champion lai Styles-a thisen a chhuak a, nimahsela chak ngei a tum hle tih a hriat. Nakamura-a hian a low blow, hemi hnu rei vak lovah Styles-a chuan a low blow zui ve nghal. Wrestler pahnihte hi an kapah an inpet ve ve a, an pahnih hian ring chhungah an tlu zui bawk. Referee-in 10 count a neih thleng pawhin an tho thei lo ve ve a, chak zawk awmlo mahse Aj Styles-a chuan title a humhim thung.

Braun Strowman and Bobby Lashley def Kevin Owens and Sami Zayn

Mipui lamin an thlir chak tawh a, an en chak chhan pawh Braun Strowman leh Lashley-a te tangdun an thlir chak avangte pawh a niang. A tawpah erawh pinfall-in Braun Strowman leh Bobby lashley-a te chuan hnehna an chang ta a ni.

Roman Reigns def. Samoa Joe

Main event nghahhlelhawm tak a ni a, WWE fans lamin an thlir chak tawh. Match tan hmain Samoa Joe-a hian a bei thut a, Reigns-a hi a sawisa nasa hman hle. Mumal taka an inbeih hnuah pawh Samoa Joe-a hian a sawisa nasa zawk a, nimahsela Reigns-a hian a counter leh thin a, Samoa Joe-a hi a chebuai lek lek thin. Match a rei deuh hnuah erawh Samoa Joe-hian a lock fuh ta zeuh zeuh a, Roman Reigns erawh tlawm mai a tumlo hle. A tawpah erawh chiang zetin Reigns-a hian a spear a, pinfall-in hnehna a chang zui nghe nghe a ni.