Boxer rothap Tyson Fury chu WWE huangah a inlan dawn a, a inlan hunah hian hlawh pawh an pe tha dawn viau a, a hlawh tur hi £12 million zet niin an sawi.
Tyson Fury hian Saudi Arabia-ah Braun Strowman chu a hmachhawn dawn a, hetianga entertainment wrestling huanga a zuan luh avang hian pawisa pawh a hlawh hnem dawn hle a. Tun thla tawp lamah hian Crown Jewel-ah heavyweight champion hi Braun Strowman nen hian an inhmachhawn dawn a ni.
Fury hi Deontay Wilder nen inhnek leh tur an nih laiin Gypsy King hi Otto Wallin nen an inhnek tum khan a mit ko a kak a, a mit ko hi duhthusamin a la dam that loh avangin boxing ring lamah hian a luh a la rem chiah lo a. Hei bakah hian Strowman nen an inhmachhawn dawn avangin a hmaa ruahmanna lo awm tawhte chu a bawh buai ve bawk a ni.
WWE Universal Champion ni mek Brock Lesnar chu Cain Velasquez nen an inhmachhawn dawn a, Velasquez hian 2010 kumah khan Lesnar chu UFC title a lo chhuhsak tawh a. Anni inbeia chak zawk zawk hi kum thar lamah Tyson Fury chuan a hmachhawn dawn niin thawm a awm der tawh a ni.
An sawi anga Brock Lesnar leh Cain Velasquez te inbeia chak zawk zawk a hmachhawn a nih chuan Tyson Fury hian Deontay Wilder nen vawi hnih an inhneka a hlawh theih tur £39.66 million ($50 million) bawr vel chu a la lut ve thei dawn niin an sawi.
Gypsy King hi kum thar February thlaah khian Las Vegas khawpuiah Deontay Wilder nen inhnek leh tura ruahman lailawk niin, nipui hunah pawh Wembley Stadium-a inhnek tura ruahman a ni bawk a ni.
A fapain WWE a ngainat em avangin Tyson Fury chu entertainment wrestling huangah hian a luh dawn phah a, a hmabak neih chu a la thutak viau nghe nghe a ni.
“Orlando khawpuia WWE hmunah training ka nei mek a. Ka mit a dam chian hma chuan chawl hahdam tur ka ni a, mahse, Braun Strowman nen inhmachhawn hi ka chak em a ni,” tiin Fury chuan a sawi.
“Wilder nen kan inhnek tur hi boxing khawvelah chuan a lian ber a ni a, khatiang lampang kha chu ka ngaihtuah rih lo thung a. Tunah tak hi chuan nuam ti takin nun ka hmang a, WWE lamah ka rilru ka dah lian ber rih a ni,” a ti bawk.