Simona Halep leh Naomi Osaka te chu Women’s Tennis Association (WTA) in Player of the Year dawng thei tura an chhawp chhuah zingah an tel.

World Number 1 Simona Halep leh Japanese nula Naomi Osaka te bakah hian Angelique Kerber (Germany), Petra Kvitova (Czech Republic) leh Caroline Wozniacki (Denmark) te pawh player tha bera thlan theih tur hian an chhawp chhuak bawk a ni.

Spanish star Garbine Muguruza chu nikum khan he chawimawina dawng tur hian an thlang a, kuminah erawh mimal chawimawina sang ber dawng thei tura an chhawp chhuah zingah hian a tel ve ta lo a ni.

American tennis ace Serena Williams chu WTA Comeback Player of the Year dawng thei tura chhawp chhuah zingah a langsar hle a. He chawimawina dawng thei tura an chhawp chhuah dangte chu Belinda Bencic (Switzerland), Bethanie Mattek-Sands (USA) leh Ajla Tomljanovic (Australia) te an ni.

Most Improved Player of the Year dawng thei turin Kiki Bertens (Netherland), Julia Goerges (Germany), Daria Kasatkina (Russia), Elise Mertens (Belgium), Wang Qiang (China) leh Aliaksandra Sasnovich (Belarus) te chu an thlang chhuak a. WTA Newcomer of the Year award dawng thei turin Amanda Anisimova (USA), Danielle Collins (USA), Mihaela Buzarnescu (Romania), Sofia Kenin (USA) leh Aryna Sabalenka (Belarus) te chu an chhawp chhuak bawk a ni.

WTA Doubles Team of the Year dawng thei turin CoCo Vandeweghe & Ashleigh Barty (USA/Australia), Barbora Krejcikova & Katerina Siniakova (Czech Republic), Elise Mertens & Demi Schuurs (Belarus/Netherland) leh Kristina Mladenovic & Timea Babos (France/Hungary) te chu an chhawp chhuak bawk a ni.

Chawimawina hrang hrang dawngtute chu October 19 hian an puang dawn a ni.