25 Oct 2020 09:18

inkhel

World record thar siamtu Lewis Hamilton

Lewis Hamilton chu Portimao-a Formula 1 Portuguese Grand Prix-ah pakhatna a ni a, Michael Schumacher lehpelin F1 driver awm tawhah chuan chak hnem ber a ni ta a, world record thar a siam.

Mercedes driver Lewis Hamilton hi Formula 1 huangah vawi 92 chu chak ber a ni ta a, a hmaa German driver ropui Michael Schumacher-a record lo siam tawh, vawi 91 chak ber nih theih chu a khum ta a. World title vawi 7 lak pawh a hnaih ve tial tial a, a champion chuan Schumacher a nihrual thei dawn chiah bawk a ni.

Kar hnih kal taah khan Hamilton hian 2006 kuma Michael Schumacher-a record siam, vawi 91 chak theih chu a nihrual a, a chak belh leh tak avang hian chak hnem ber a ni ta a, a record hi khum a harsa tawh viau dawn a ni.

Hamilton hian drivers’ championship lamah pawh hma a hruai mek a, tun season chhungin vawi nga an la intlansiak dawn a, tun dinhmunah British driver hian point 77 zetin hma a hruai mek a ni.

Intlansiak tan tirhah hian ruah tlem a tla siar siar a, lap hmasa berah Hamilton chu a teammate Valtteri Bottas chuan a lehpel a, McLaren driver Carlos Sainz chuan a rawn lehpel ve leh chhawng bawk a ni.

A hnuah Bottas leh Hamilton te chuan Sainz hi an lehpel leh ve ve a, lap 20 an tlan laiin Hamilton hian Bottas chu a lehpel leh bawk a, hmahruaitu a ni chho leh chiah a ni.

Intlansiak tawpah hian Bottas chu pahnihna niin, Red Bull driver Max Verstappen chu pathumna a ni a. Ferrari driver Charles Leclerc chu palina niin, pangana chu Alpha Tauri driver Pierre Gasly a ni.

McLaren driver Carlos Sainz chu parukna a ni a, Racing Point driver Sergio Perez chu pasarihna a ni bawk a. Pariatna chu Renault driver Esteban Ocon niin, a hnungah hian Renault driver Daniel Ricciardo leh Ferrari driver Sebastian Vettel te an awm bawk a ni.

Formula 1 driver awm tawh zawng zawng zingah kum 35-a upa Hamilton chu chak hnem ber niin, vawi 92 a chak tling ta a. Pahnihna chu Michael Schumacher niin vawi 91 a chak a, vawi 53 chak tawh Sebastian Vettel chu pathumna a ni bawk a. Vawi 51 chak thei Alain Prost leh vawi 41 chak thei Ayrton Senna te chu Top 5 huangah hian an tel bawk a ni.