​World no. 839 Andy Murray

17th July 2018, 09:07PM

Scot pachal Andy Murray chu a khel (hip) bawr hliam avangin kum khat chuang a inkhel mumal tawh lova, ATP tournament-ahte tel mahse a hma a la pha lo hle a, Wimbledon-ah pawh inlan tum hle mahse a inhnukdawk leh ta zawk a nih kha.

Grand Slam vawi thum lai la tawh hi Wimbledon atanga a in hnuhdawh hma pawhin world ranking-ah hian no.156-naah a tla thla tawh a, British no.1 a nihna pawh kum 2006 hnuah a vawikhat nan Kyle Edmund-a lakah a hloh nghe nghe.

Wimbledon –a a inhnuhdawh hnu hian Scotsman hi tla lehin tunah hian world ranking-ah no.839-na a ni a, British ranking-ah pawh no.23-na a ni.

Murray hian a inhnuhdawh chungchangah a inchhir loh thu leh thutlukna dik tak a siam thu a lo sawi tawha, tunah hian US hard-court season tun thla tawpa Washington-a neih turah inlan turin a inbuatsaih mek a ni.

World ranking-a tla vet ho Serena Williams erawh Wimbledon-ah champion zo lo mahse no.153-na atangin no.28-naah a rawn chho ve thung a ni.

Copyright © inkhel.com 2024. All rights reserved.