10 Jun 2019 10:27

inkhel

World No. 2 thar Ashleigh Barty

French Open champion Ashleigh Barty chu WTA ranking-ah a kaisang hle a, a vanglaia a tawn san ber tum niin, World No. 2 a ni.

Australian tennis star Ashleigh Barty hian kum thum kaltaah khan tennis khelh chawlhsan lailawkin cricket a khel a. Cricket a khelh hnu hian tennis khawvelah a kir leh a, kum thum dawn tennis a khelh leh hnuah WTA ranking-ah a lawn sang hman viau mai a, a hmaa a awmna aia hmun rukin a san belh a, a chungah hian US Open leh Australian Open champion Naomi Osaka chiah a awm tawh a ni.

Kum 23-a upa Barty chuan, “Ka tan chuan khawvel thar a inher chhuak a ni ber a. Thil engkim hi a thar a ni vek mai a, tawn hriat thar, rilru thar a ni zel a. Kumin kum tir lama ka thil tum lian ber chu Top 10 huang chhunga awm theih kha a ni a, chu chu ka puitlin thei ta a. A hnuah chuan Top 5 ka tinzawn leh a, ka beisei aia hmain ka puitlin leh thei hlauh bawk a ni,” a ti.

“Engkim mai hi a rawn ni teh thut lutuk a, awm thiam pawh harsa ka la ti rih hle a. Kar hnih chhung chu beisei phak loh ramah ka awm a ni deuh ber mai a. Tunah chuan muangchangin thil awm dan te ka ngaihtuah chiang ang a, ka chawl hahdam phawt ang a, dinhmun thara ka ding hi ka lawm te te ang a, chumi hnuah thil tum thar ka nei leh chauh ang,” a ti bawk.

Ashleigh Barty hian tournament lian thamah a thleng sang ngai lo hle a, kumin January thlaa Australian Open-ah khan quarter final a lut thei a, a la thlen san ber tum niin, Roland Garros-ah final a lut chho a, a khingpui kum 19-a upa Marketa Vondrousova chu 6-1, 6-3 a hnehin tennis a khelh tirh ata Grand Slam title a lak hmasak ber tum a tawng zui a ni.

2014 US Open khelh zawhah tennis khelh chu chawlhsan lailawk a duh thu sawiin, a reh zui daih a. 2016 khan tennis khawvelah hian a kir leh a, hemi kum June 8 khan ranking-ah pawh a hming a lang ve leh tan a, World No. 623 a ni a. Tunah chuan World No. 2 niin, a aia sang pakhat chiah a awm tawh a ni.

French Open-a pahnihna Marketa Vondrousova chu No. 38 atangin No. 16 ah a kai chho a, semi finalist kum 17-a upa, American tennis player Amanda Anisimova pawh a kaisang dawrh mai a, No. 51 atangin No. 26 ah a chho bawk a ni.

Quarter final-a Anisimova hneh lotu, defending champion Simona Halep chu No. 3 atangin No. 8 ah a tla thla a. French Open champion hlui Garbine Muguruza pawh a hma aiin hmun rukin a tlahniam a, No. 25 a ni.