Amit Panghal chu tun hnaia IOC hnuaia Boxing Task Force in ranking an siamah khawvelah a chungnung ber a, Indian boxer zingah chuan kum 10 chhunga hetiang dinhmuna ding leh thei hmasa ber hi a ni.

2009 kumah khan Olympic bronze medallist Vijender Singh chu World No. 1 a lo ni tawh a, India tan world championship-ah lawmman a la thei a, 75 kg division-ah bronze medal a la a ni.

World silver medallist Amit Panghal (52 kgs) hian point 420 a hmu a, ranking tharah hian No. 1 a nih theih phah a. Hetiang lampang buaipuitu International Olympic Committee (IOC) hnuaia Boxing Task Force te chuan kalphung mumal tak neiin ranking hi an siam a ni.

Boxing Task Force te hian Olympic qualifier chu an huaihawt dawn a, International Boxing Association (AIBA) chu sum enkawl dik loh chungchangah an suspend mek avangin Tokyo 2020 Olympic velah pawh Boxing Task Force ho hi a buaipuitu turte chu an ni ang.

Tuna ranking chhuak tharah hian tun hnaia mipa leh hmeichhia world championship neih vawi hniha an result an en deuh ber a, hei bakah hian 2019 chhunga continental championship leh Asian Games te kha an thlir tel bawk a ni.

Thla tharah hian Amman, Jordan ah Asian Olympic qualifiers chu an nei dawn a ni.

2017 atang khan Panghal hi a che tha chho hle a, 2018 Commonwealth Games leh Asian Games ah te khan gold medal a la ve ve a. Nikumah khan Asian meet-ah gold medal a lak bakah world championships-ah silver medal a la bawk a, Indian boxer zingah chuan hetiang ti thei hmasa ber hi a ni nghe nghe a ni.

Hmeichhe lamah chuan MC Mary Kom chu 51 kg category-ah pangana a ni a. Nikumah khan Mary Kom hian world championship bronze medal a la a, point 225 a hmu thei a. A elpui Nikhat Zareen chuan point 75 hmuin 22-naah a awm a ni.

Lovlina Borgohain chuan 69 kg category ah pathumna dinhmun a hauh mek a. Kum 22-a upa Borgohain hian vawi hnih chu world bronze medal a lo la tawh a ni.