20 Nov 2020 12:07

inkhel

World Muaythai Championship-ah RC-an medal la

October ni 20, 2020 atanga tan IFMA Virtual World Muaythai Championship-ah India aiawha tel K.Lalramchhana, Dawrpui chuan +40 years, +75kgs MaxFit Category-ah bronze medal a dawng.

COVID-19 vanga championship a huaihawt theih loh vangin World Muaythai Governing Body - IFMA chuan virtual world championship a buatsaih a, a hnuaia ram 136 atangin tel an thahnem hle. India aiawha Mizo player tel phak pathum zingah K.Lalramchhana'n medal lain India chuan a pumpuiah bronze medal 6 a dawng a ni.

Virtual World Muaythai Championship endik tur hian IFMA chuan International Referee & Judges 157 a ruat a, chung zingah chuan Wai kru leh Shadow Box te endiktu zingah Samuel Lalrozama Hmar pawh a tel nghe nghe.

India player K.Lalramchhana medal lakna MaxFit Category-ah hian Roberto Nell Jone Astudillom, Phillipines chu pakhat a ni a, Denos Costa, Brazil chu pahnihna niin K.Lalramchhana, India leh Jacob Herman, South Africa ten bronze medal an dawng ve bawk.

K.Lalramchhana hi Muaythai Asociation of Mizorm Executive Committee member ni lai leh Referee & Judge a ni a, hripui leng avanga India mai ni lo khawvel huapa intihsiakna lian buatsaih theih a nih loh laia India Mizoram tana medal a la thei hi kan chhuang takzet a, a kal zelna turah duhsakna kan hlan a ni.

(adsbygoogle = window.adsbygoogle || []).push({});