Thla sawm lai an khelh zawh hnua a liam tawh hnuin Brazil chuan World Cup stadium thenkhat chu anih tur ang thlapin an sa zo ve chiah.

Stadium an sak zawh tak chauhte hi Sao Paulo-a Itaquerao Stadium leh Curitiba-a Arena da Baixada an ni a, World Cup lai khan hman chu an ni ve ve a mahse an duan ang thlapin an peihfel hman lo.

Brazil hian World Cup atan khan $3bn (£1.98bn) vel an hmang a, hei hi an ram mipui tam tak chuan an duh lo va dodalna pawh an khel tan hma khan a nasa hle. Rio de Janeiro, Sao Paolo leh khawpui hrang hrangahte lungawilohna lantirin mipui leh police an in hmachhawn a, venhimna pawh uluk phah hle a ni.

Brazil sawrkar chuan khelmual thar leh tha zawk bakah an neihsate chei that an beisei a, mahse stadium an cheithatnate a beitham hlawm hle.

Corinthians club-in $450m (£297) man Arena Corinthians neitu nihna an chelhzui a, mipui leng tam mahse an sum hmuhte stadium sak nan a an bat rulh nan a kal ral zel tih an sawi.

Flamengo-in World Cup final khelhna Maracana Stadium an hmang zui ve bawk a, mahse stadium neitu thar hnuaiah ticket atangin sum an hmu tlem thei hle tih an sawi ve bawk.

Hetih mek lai hian Constructor OAS chuan World Cup khelhna tho stadium pahnih - Arena Fonte Nova leh Arena das Dunas chu tun thla hian an zuar tan dawn tih an tarlang.