14 Jun 2018 02:10

inkhel

World Cup opening ceremony

2018 FIFA World Cup chu kan hmuak thleng a ni deuh tawh mai a, naktukah an tan tawh dawn a. Inkhel an tan hmain ropui takin a hawnna hun an hmang phawt ang.

Russia ramah chuan tlai dar 5:30 ah opening ceremony hi an tan dawn a, India ramah chuan zan dar 8:00 a ni ang a. British star Robbie Williams chu a hawnnaah hian a langsar ber pawl a ni ang a, Robbie Williams bakah Russian soprano Aida Garifullina pawh a inlan ang a. Anni bakah hian Spanish tenor lar, opera icon ni bawk Placido Domingo a zai ang a, opera singer dang, Peruvian tenor Juan Diego Florez pawh a inlar ang.

Kum dangah chuan inkhelh hma darkar khat vel la awmin opening ceremony hi an tan thin a, mahse kuminah chuan inkhelh hma darkar chanve velah an tan thung ang a. Dar 8:00 ah opening ceremony hi an tan ang a, dar 8:30 ah inkhel hmasa ber, a thlengtu Russia leh Saudi Arabia te inkhel en tur a awm zui dawn a ni.

Robbie Williams chuan World Cup hawnnaa a puipa ber a ni tur chu lawmawm a tih thu a sawi a, “Hetiang hun ropui tak maia Russia rama ka kal tur hi lawmawm ka ti a, ka ngaihlu tak zet a. Ka vanglaiin thil tam tak ka tawng ve teuh a, mipui 80,000 vel zet leh TV atanga thlirtu mi maktaduai tam tak hmaa FIFA World Cup hawngtu ka ni tur hi a la ropui berin ka hria a. Hetiang baka duhthusam hi a awm lo ang,” a ti.

Milar thahnem tak chuan opening ceremony hi chhim an tum a, heng zingah hian World Cup trophy vawi hnih la tawh, Brazilian star Ronaldo pawh a tel a. “Opening match hi tun thlengin ka la ngaihlu em em reng a, theih hram chuan en zel ka la duh a. Hetiang hun tak hi player emaw, fan emaw te’n kan nghahhlelh kum li a rawn inher chhuak a ni tichiangtu a ni si a,” tiin a sawi.

Kumin World Cup hla ‘Live It Up’ tih satu pathum - Nicky Jam, Will Smith leh Era Istarefi te erawh chuan opening ceremony-ah hian an tel dawn thu an sawi lo.

Tarlan tawh angin opening ceremony hi Moscow khawpuia Luzhniki Stadium-ah an huaihawt ang a, India ramah chuan Sony Ten 2/Sony Ten 2 HD ah en theih a ni ang a. Sony LIV chuan live stream an pe bawk ang.