2022 World Cup boruakin min chim a, Bethlehem lam pan a hun tawh laiin Qatar-ah kan la cham tui hle.
Zing nilum ai titiah pawh thudang a leng lova, thingpui no dawm chungin 'Referee khan tan lam a nei' tihte, 'Penalty pekna tur a nilo' tihte, 'Beisei an va han pha lo tak' tihte leh 'Chumi khami chu an champion ang' tih thupui sawiin tukthuan kan nghak thleng thin.
Rual u deuhte'n Diego Maradona, Macro van Basten, Roberto Baggio leh Gabriel Batistuta-te thiam thin zia an sawi a, naupang deuh chu an titi kotlangah kan dak dauh dauh zel. Ni e, club football ngaina vak lo pawhin World Cup hi chu an en peih a, ram leh ram intihsiakna anih avangin a nep thei tak tak lo.
Club chungchanga in haw em em thinte pawh World Cup hian a phuar khawm a, ram pakhat tana au hoin an in hmelmakna an dah tha thin. Player-te'n an ram tan theihtawp an chhuah a, fans lam pawhin an tawiawm tha thei ngei mai. Intihsiakna atanga tla te'n insum harsa anti a, tih theih an neih tawhloh avangin mittui nen World Cup hi an mangtha thin.
An khelh ber football ang bawkin World Cup hi a nunrawng khawp mai a, dim leh duat bik pawh a nei hran lo. Team tha tak nia kan ngaihten group stage an paltlang zo lo fo a, chetha tur kan beisei player-te'n suangtuahna an thamral tir fo bawk. Hetih lai hian player tam tak chuan larchhuah nan an hmang a, ram lar vak lote tan inphochhuahna tha tak a ni bawk.
Khelh pha nih ringawt pawh in chhuanna tham a tling a, goal khung thei nih pheichu lunghlu tluk zetin a hlu. Borussia Dortmund, Bayern Munich leh Barcelona tana goal khung thei em em Robert Lewandowski chuan Saudi Arabia laka goal a khung hnuah a mittui a dang zo lova, World Cup-a goal a nei ve ta mai hi a dah ropui hle.
Poland striker hian 2018 World Cup-ah khan goal a khung lova, kuminah erawh goal hnih neiin intihsiakna a thlahliam. A vanneih tum chu nise goal li khung thei a ni a, Saudi Arabia leh Mexico an hmachhawn tumin penalty a pet goal lo. Champions League, Bundesliga, UEFA Super Cup, The Best FIFA Men's Player Award leh European Golden Shoe-te pawh hui vek tawh mahse, World Cup-ah sulhnu ropui a hnutchhiah thei lova, goal hnih lai a khung ve ta hi a lawmpuiawm hle.
Panama chuan kum li liamta khan Russia-ah a vawikhat nan World Cup an khel a, ram lar leh player nei tha an nih loh avangin beisei pawh an nei sang lo. Mahse, World Cup-a an tel thei hi an lungawi tawk em em a, fans nei tam lo chungin an phur ve hle.
Group stage-a an game hmasa berah 6-1 in England an hneh lova, result en mai chuan an insawp nasa tih a chiang. An goal neih chhun hi minute 78-naah Felipe Baloy chuan a khung a, an champion ta emaw tih mai turin an khawsa. Goal an khung lai hian si ruk lai an phur tawh a, an ngaih pawimawh leh ngaihhlut ber chu World Cup-a goal an khung ve ta hi a ni.
In lam entu an ram mipuite'n lam an thai a, champion team aiin an lawmna hi a nep bik lo. A hunlai khan vanram tlafualah an cheng a ni ber a, World Cup ropui zia an tilang chiang hle bawk. An hunlaia khawvel hriat tham ni pha Eric Cantona, George Weah, Alfredo Di Stefano, Andrei Arshavin, George Best leh Ryan Giggs-te khan World Cup hi an tem miah lova, khel phak leh khel thei nih hi an ngai hlu hle.
Kumin World Cup pawh hian thawm a nei lian khawp mai a, an tan chauh emaw tih laiin a tawp lam an hnaih ta hle. Pathianni zanah hian final an khel tawh mai dawn a, kum li dana thleng leh chauh tur anih avangin a lunglenthlak leh vawng vawng dawn ngei mai.
Kumina intihsiakna thlengtu Qatar hian khelmual pariat an hmang a, khawpui pangaah nghah niin an hlawhtling vet vet hle. Khelmual pariat an hman zingah hian pasarih chiah hman tlakin a ding tawh a, khelmual pakhat chu an thiat tan der tawh.
An thiah mek hi Stadium 974 an tih kha niin tunkar tir atang khan an thetdarh a, lawnglian ho hman thin bawm lian tak (shipping container) hmanga sak a ni. He khelmualah hian kar hnih chhungin match sarih a thleng a, inkhel hman zingah hian Portugal, France, Argentina leh Brazil-te pawh an tel.
A hming hi Qatar international dialling code leh bawm an hman zat atangin an phuah a, Qatar sawrkar chuan World Cup zawhah an thiat zo dawn tih an sawi. Bawm an hman leh bungraw thenkhat hi Africa leh Uruguay lamah an thawndarh dawn niin an sawi a, an thawndarhna ramte hian 2030 World Cup an thleng maithei.
Fenwick Iribarren Architects chuan Stadium 974 hi an duang a, China International Marine Containers-in a cheimawi hna an thawk thung. Thiah leh mai theiha an siam chhan hi hlui hlawn an hlauh vang a ni pakhat a, tunhnaia World Cup thlengtu South Africa, Brazil leh Russia-te khan rauhsan tak khelmual an nei nual niin an sawi.
Stadium 974-ah chiah hian boruak tihvawhna (air-condition) an dah lova, khelmual dangah chuan boruak tihvawhna hi dah tel. AC a awm ve loh avang hian tlai ni nemah an inkhel chauh zel a, ni a tlang san lai chuan inkhel theihna chi a nilo.
Thiah mek ni mahse an thiat zo nghal vek dawn lova, Qatar World Cup organising committee chuan fashion show leh concert huaihawt nan an la hmang leh dawn tih an sawi. Mi 44,089 len theihna khelmual hi bawmin a hual vel a, rawng hrang hrang an nih bawk avangin a dangdai angreng hle.
Brazil-in Round of 16-a South Korea an hnawhchhuahna khelmual kha a ni a, Heung min-Son leh a thiante lungchhe taka an tahna hmun kha a ni. Environmental watchdog group Carbon Market Watch chuan hetianga lakchhawn zung zung theih an siam hi an fak khawp mai a, intihsiakna thleng leh turte tan pawh a tangkai dawn hle niin an sawi.
World Cup organising committee chuan stadium danga thutna (seat) 170,000 pawh ram dang hnenah an pe dawn tih an tarlang a, Carbon Market Watch chuan an sem kualna turah hian ruahmanna ala awm loh thu an sawi.
Stadium 974 an sakna hmunah hian engnge an dah leh dawn a hriatloh a, mihring chen theihna tur emaw intihhlimna hmun emaw siamin an cheizui tho chu a rinawm. World Cup stadium awm tawh zing zingah Stadium 974 hi hunrei lote chhung atan an din (temporary stadium) hmasa ber a ni a, a hriatreng tlak hle a ni.