International Cricket Council chuan Men’s Cricket World Cup khelh meka mi chungnung zual pali an thlang chhuak a, Thawhtanni khan heng mi pali an thlan chhuahte hming hi an puang.

ICC chuan Twitter-ah an mi thlan chhuahte hi puangzarin, player dangte aia chungnung an nihna pawh an ziak lang nghal a. An thlan chhuahte chu Rohit Sharma, Mitchell Starc, Joe Root leh Alex Carrey te an ni.

Mi pali an thlan chhuahte thlalak an tarlan pah hian a thu an dah tel a, run siam hnem ber, wicket la hnem ber, ball man hnem ber leh mi vawm chhuak hnem ber an nihna an tarlang a. The Four Superstars of #CWC19 tiin an dah tel bawk.

An mi thlan chhuahte chu chanchin tlem han tarlang ila:

Rohit Sharma
India opener Rohit Sharma chu tun tournament bika run siam hnem ber a ni mek a, an khelh tawh chinah run 647 zet a siam tawh a ni.

Sri Lanka lakah run 100 a siam tling a, kha vang khan Rohit chu World Cup vawi khat khelha century vawi 5 siam thei awm chhun a la ni a. Kum 32-a upa Sharma hian tun tum tournament-ah hian a zawnin vawi thum chu century a siam tawh a, ODI bika a zawna century vawi thum siam thei hi a hmain 10 chauh an la awm a ni.

Mitchell Starc
Kum 29-a upa left-arm pacer hi tun tum tournament khelh tawhah a che tha thei hle a, wicket la hnem ber record chu Trent Boult a tawmpui mek a. Boult hian 2015 World Cup-ah khan record a siam a, Starc hian a nihrual ve thei a. Tun tumah hian Starc chuan a vaiin wicket 26 a la tling tawh a ni.

Mitchell Starc hian England leh Sri Lanka te nen an inkhelhin wicket 4 ve ve a la thei a. West Indies lakah phei chuan wicket 5 a la a. An game hnuhnung bera New Zealand nen an inkhelh tumin 5-26 a puitlin leh bawk a ni.

Joe Root
England top-order batsman hi kumin World Cup-ah chuan ball man hnem ber a ni mek a, an khelh tawh zawng zawngah vawi 11 chu ball a man tawh a. Ball a man theih bakah hian Root chuan run 500 a siam tling tawh bawk a, an team-ah chuan run siam hnem ber a ni.

Alex Carey
Carey vanga out phah an tam ta mawlh mawlh viau a, tun tournament chhungin Carey vanga chhuak hi mi 19 ngawt an awm tawh a, hengte hi ball a lo man avang te leh stumping vang te a ni a. World Cup vawi khata mi chhuahtir hnem ber record ding lai a tluk teuh tawh hle a, Adam Gilchrist chuan mi 21 chhuahtirin record a chelh mek a ni.

Kum 27-a upa Alex Carey hian tun tournament chhungin run 329 chu a siam tawh a ni.