24 Nov 2018 06:06

inkhel

World champion ni hnem ber Mary Kom

Indian boxer ropui MC Mary Kom chuan World Championship final-ah Ukrainian boxer Hanna Okhota chu chiang deuha hnehin a champion a, khawvela hmeichhe boxer zingah world title 6 la thei hmasa ber a ni.

New Delhi khawpuia Women’s World Championship 48kg category final-ah hian Manipuri boxer Mary Kom chuan a hmaa ding Hanna Okhota chu unanimous decision (5-0) in a hneh a, Women’s World Boxing Championships neih tirh ata boxer hlawhtling ber a ni thei ta a ni.

Mary Kom hian 2002, 2005, 2006, 2008 leh 2010 te khan Women’s World Boxing Championship gold medal a lo la tawh bawk a, Ireland boxer Katie Taylor nen gold medal lak hnem lamah pawh an inang a, record an chelh dun a. Mary hian 2001 khan silver medal a lo la tawh bawk a, heti hian a vaiin medal pasarih ngawt mai a la ta a ni.

Kum 35-a upa Mary hian World Championship hrim hrimah, mipa leh hmeichhia tel vekin, Cuban boxer Felix Savon chu a nihrual ta chiah bawk a, khawvela boxer hlawhtling ber an ni dun ta a. Felix Savon hian a hun laiin Olympic gold medal pathum a la thei a, 1986 leh 1989 inkar khan World Championship heavyweight-ah gold medal paruk leh silver medal pakhat a la a ni.

Zirtawpnia semi final-ah Mary Kom chuan North Korean boxer Kim Hyang Mi chu 5-0 in a hneh a, final hi a lut a. Final-ah hian chiang zetin Hanna Okhota hi a hneh zui leh bawk a ni.

A hlawhtlinna chungchangah Mary chuan, “Ka medal lak hi hetiang thleng thei tura min buaipuitute hnenah ka hlan a, India ram tan he gold medal hi ka hlan e,” tiin a sawi.