​Wolves mualah Chelsea an tal na

15th September 2019, 03:09AM

Chelsea chuan an Premier League game nganaah Wolves an tlawh a, Molineux Stadium-ah London club Chelsea hi 5-2 in an chaka, point thum hlu tak an hlawhchhuak.

Chelsea tan hian an academy player pathum-te’n goal an khunga, Tammy Abraham chuan hattrick siamin, defender Fikayo Tomori leh midfielder Mason Mount-te chuan goal khat ve ve an khung bawk. Wolves tan hian Saiss leh Patrick Cutrone-te chuan goal an khung ve bawk.

Kum 21 leh ni 347-a upa Abraham hi Chelsea tana Premier League hattrick siam thei naupang ber a ni a, kum 2015-a Raheem Sterling hnua English mi Premier League-a hattrick siam thei naupang ber a ni bawkin, kum 2011-a Frank Lampard hnua English mi Chelsea tana hattrick siam leh thei hmasa ber a ni bawk.

Chelsea hian game ngaah point riat hlawhchhuak tawhin paruknaah an awm meka, Wolves hian game ngaah point thum chiah la hlawhchhuakin 19-naah an awm mek thung a ni.

Wolves 2-5 Chelsea

(Saiss 69’, Cutrone 85’) (Tomori 31’, Abraham 34’ 41’, 55’, Mount 90+6’)

Player Ratings

Wolves - Patricio 6, Vallejo 6, Coady 5, Saiss 6, Traore 6, Dendoncker 5, Neves 4, Moutinho 5, Jonny 6, Jota 5, Jimenez 4. Subs - Doherty 5, Cutrone 6, Gibbs-White 5.

Chelsea - Kepa 4, Rudiger 7, Christensen 6, Tomori 8, Azpilicueta 6, Jorginho 7, Kovacic 7, Alonso 6, Willian 6, Mount 8, Abraham 9. Subs - Barkley 5, Batshuayi 5, Zouma 6.

Match Report

Inkhel tan a ni a, a tir lam darkar chanve chhung velin team hnihte’n chance insiam lutuk lo mhse darkar chanve hnu lamah erawh goal a lut zawt zawt a ni ber. 31mins-ah Chelsea chhulchhuak Tomori chuan mawi em em yard 35 vela hla atangin ball chu Wolves goal-ah chhuih lutin Blues in hma an hruai.

Tomori-a’n goal a khung hnu lawk hian tun hnaia goal khung thei em em Abraham chuan Chelsea goal hnihna a khung zui leh nghala, rem lem lo tak chungin Abraham hian goal a khung. Half time hma lawkin Chelsea-in an goal thumna an khung belha, goal khungtu hi Abraham bawk niin, Marcos Alonso-a cross tha zet chu goal-ah a lo head luta, ani hian a zawnin game thum chhung goal khat aia tam a khungna a ni.

Second half khelh a ni a, minute sawm khelh a nihin Chelsea academy chhuak Abraham chuan a goal thumna leh Blues goal lina a khung; Abraham hian long ball a hmuh chu box pawn chiahah tha taka lain, Wolves captain Coady nen an indin chilha, box chhungah Coady hi bumin a pet goal zuia, hattrick siamin, tun season-ah goal sarih khung tawhin Premier League top scorer a ni mek.

Chelsea hi tun season-a an lo tih dan angin second half-ah an mawng a pawp leh deuh a, goal hnih an chhuah. 69mins-ah Wolves hian corner hmu in corner atanga ball vawrh luh chu Saiss chuan lo head-in Kepa chu  zawn angreng viau mahse Kepa hian a dang zo lova, Abraham-a ban fuhin goal-ah a luta, Abraham-a own-goal ang pawhin he goal hi a pawm theih.

Hun tawp hma deuh lawkin Wolves hian goal an khung belha, Doherty-a shot tha tak chu Kepa chuan lo dang perin Cutrone-a tan ball a tla rem a, Cutrone hian goal-ah chantirin Premier League-a a goal hmasa ber a khung. Inkhel a tawp dawn tawh tihah Chelsea academy chhuak dang Mount chuan Chelsea goal ngana a khung leh a, Chelsea hi khual mualah 5-2 in hnehna an chang ta a ni.

Chelsea hian second half-ah hian chance tha an insiam ngun angreng viaua, mahse goal khat bak an khung tawh lo. Wolves pawh an insangmara, goal hnih khungin, goal thumna khungna hun tha pawh insiam ve thin mahse vawi hnih bak Chelsea defence an paltlang thei lo a ni.

Copyright © inkhel.com 2024. All rights reserved.