Tottenham manager Jose Mourinho chuan Wolves bakahPremier League kaithar Sheffield United te chu top 4-ah an awm thei tih a sawi rualin a club hlui Manchester United erawh a sawi lang ve lo.

Tun season-ah kaithar Sheffield hi Premier League-ah beisei phak bakin an che tha a, tunah hian khelh 26-ah point 39 hlawhchhuak tawhin pangnaah an awm meka, an manager Chris Wilder chu Manager of the Season dawng tura rinkai ber zinga mi a ni mek.

Wolves hi tunah hian khelh 25-ah point 35 hlawhchhuak tawhin 9-naah an awm meka, mahse 6-naa awm Tottenham hian point hnih chauha inthlauin khelh khata inlehthal vek thei an ni bawk.

Mourinho-a team Tottenham hi 6-naah an awm meka thunga, anni hian khelh 25-ah point 37 an hlawhchhuak tawha, an chung chiaha awm Sheffield nen point hniha inthlauin Tottenham hi khelh khatin an khel tlem zawk bawk.

Mourinho chuan, “Wolves leh Sheffield United hian top 4-a awm an tum meka, an manager te chuan top 4-a awm chu an thei lo angin an sawi thei, chuti anga an sawi a nih pawhin ka hrethiama, mahse a nihna takah chuan top 4-a awm thei an ni. Tuna table-a a dinhmun vang mai piah lamah hian top 4-a awm turin an tha tawk a ni.

“Tuna an dinhmun en hian mi dang zawng zawng chuan an hlim viau turah kan daha, mahse an lung a la awi tawk lo niin a lang. Wolves hian player pawimawh an lak luh belha, an dinhmun siamthat an tum mek. Sheffield pawhin player pawimawh la lutin, an transfer record an break nghe nghe a, an team thawmthat an tum hle.

“Tottenham, Arsenal, Chelsea leh Everton-te chiah hi top 4 inchuh an ni lova, keimahni chiah pawh kan ni hek lo, he team hnih Wolves leh Sheffield te hi an tha hle a ni,” a ti.