Premier League club Wolves chuan an captain Ruben Neves chu thlun ngheh an duh a, contract thar an zawrh dawn tih chanchinbu mite chuan an tarlang.

Kum 2017 khan FC Porto chhuahsanin Neves hian Wolves hi a zawm a, hetih hun lai hian Wolves hi Championship-ah an la awm. Tunah erawh Neves hi Premier League-a midfielder tha ber zinga mi a ni mek a, Wolves hian hun rei daih contract thar ziahpui an tum nia sawi a ni.

Portuguese midfielder hian kum 2018 khan contract thar a ziaka, tunah hian Wolves-ah season khat dang daih contract a la nei a, kumin nipuiah Wolves hi a chhuahsan dawn anga sawi a tam hle.

Kum 26 mi hi Premier League club lian te bakah, Barcelona pawhin nipui bazar inhawn hunah lakluh an tum hle nia report a ni a, Wolves hian chelh an duh hle a, mahse an chelh thei ta lo a nih pawhin man to zawka an hralh theih nan contract thar an zawrh dawn niin a lang.

Neves hian Wolves tan game 250 a khel tling dawn tawha, season kal mekah Premier League game khat bak khelh loh a la nei a, hei pawh hi yellow card panga a hmuh tawh vang a ni.

Wolves hian duh angin season an hmang tha lova, khelh 27 an khelh hnuah point 37 neiin, 13-na dinhmun an luah meka, an tum anga season an khar tha lo a nih chuan, Neves hian contract thar hi a ziak duh kher dawn em tih chu zawhna lian tak awm mek a ni.