Europa League round of 16 la khelh zawh loh te chu khelh zawh fel a ni ta a, Premier League club Wolves chuan an tumpui Olympiacos hnehin quarter final an luh bakah, Bayer Leverkusen, Sevilla leh FC Basel te pawhin quarter final an lut bawk.

Europa League quarter final lut tur chu ti hian tihfel a ni tawha, Wolves, Leverkusen, Sevilla leh Basel te bakah hian a hma in Manchester United, Copenhagen, Inter Milan leh Shakhtar Donetsk-te chuan quarter final an lo lut tawh.

Wolves hian first leg-a 1-1 a an lo inhnehtawkpui tawh Greek club Olympiacos lo mikhualin, si khat faiin an lo hneha, aggregate-ah 1-1 in Wolves hian hnehna an chang. Second leg inkhelah hian Wolves tan Raul Jimenez chuan hun tir lamah penalty spot atangin goal a khunga, hei hi Wolves chuan an chakpui ta a ni.

Wolves 1-0 Olympiacos (agg 2-1)

(Jimenez 8’pen)

German club Leverkusen chuan first leg-a 3-1 a an lo hneh tawh Scottish club Rangers chu lo mikhualin, si khat faiin an hneha, aggregate-ah 4-1 in an tlang.

Steven Gerrard leh a naute tan tun season-a an Europa League zinkawng a tawp ta a, second leg inkhela Leverkusen goal neih chhun hi Moussa Diaby-a khung a ni.

Bayer Leverkusen 1-0 Rangers (agg 4-1)

(Diaby 51’)

Europa League-a champion thiam Sevilla chuan Roma chu 2-0 in an hneha, quarter final khel turin an pet tling ve bawka, he inkhelah hian Sergio Reguilon leh Youssef En-Nesyri te chuan Sevilla tan hian goal khat ve ve an khung.

Sevilla leh Roma te hian lockdown hma khan first leg an khel ve hman lova, hemi a nih avang hian Germany-a MSV-Arena ah inkhelin, vawi khat chiah hi an khel dawn.

Sevilla 2-0 Roma

(Reguilon 21’, En-Nesyri 44’)

FC Basel chuan first leg-a 3-0 laia an lo hneh tawh German club Eintracht Frankfurt an lo mikhuala, Basel hian Fabian Frei-a goal khat hmangin hnehna an changa, 4-0 in aggregate ah an tlang.

FC Basel 1-0 Eintracht Frankfurt (agg 4-0)

(Frei 88’)