Kumin chu Wimbledon leh FIFA World Cup khelh hun a inrual a, boruak lian tak pahnih hian infiamna lampang ngainatute rilru a pawt darh mek a. Hetiang boruak karah hian tennis star thenkhat chuan World Cup hi an buaipui ve hle.
Wimbledon a tel player te chu court-ah han inbei map map mahse locker room velah chuan hmelma an awm thei tak tak lo niin French star Gael Monfils chuan a sawi a. Player te chuan locker room-ah hian football khel enin TV pakhat an bial tuau zel niin a sawi.
Monfils chuan, “World Cup zet hi chu a danglam deuh a ni. Kan inkhelh loh lai chuan thil dang kan sawi tam lo khawp mai a, kan titi tam berah World Cup chungchang hi a ri a ni ber mai a. Locker room-ah inkhel kan en nasa thei khawp mai,” a ti.
Thawhlehnia England leh Colombia inkhel en tur khan Monfils hi London khawpuiah a vak kual a. Pub pakhatah inkhel en an lo awm teuh tih a hmu a, chutah chuan a tei lut ve tawp mai a. Penalty shootout pawh pub-ah hian a en tluanchhuak ve a, a boruak sosang vel chu pui a tih thu a sawi.
“England leh Colombia inkhel kha phone atangin ka en phawt a, a hnuah penalty shootout kha pub pakhatah an en tih ka hmu a, ka lut ve tawp a, ka en ve ta a. A boruak chu pui mep mep tak a ni! Ka sawi fiah thiam lo. Ka phone pawh ka lek chhuak ngam lo. An ri hulh hulh vek mai a. A then an zuang vak vak a, an au chiam chiam bawk a, engkim mai kha a ri luih luih a ni ber a. Beer lah chu hmun tinah a awm a, nuam tak a ni,” tiin Monfils chuan a sawi.
Vawi 8 ngawt Wimbledon champion lo ni tawh Roger Federer pawhin hun awl nei lo viau mahse World Cup chu a en ve hram thin a. Thawhlehni khan Switzerland chuan 0-1 in Sweden an hneh ta lo a, mahse inkhel en chu a thulh phah chuang lo.
“Kan ram an tla kha chu ka thin a rim ve deuh a, a hrilhhaithlak hle a. Mahse, knock out a nih hi chuan khatiang kha thil thleng thei vek a ni si a. Hun tha kan neih kan bawhpelh a, Sweden kan han hneh ta lo ngawt mai chu ania,” tiin Federer chuan a sawi.
A sawi zelnaah, “Kan phu tawk kan hmu niin ka ngai a, khawvela team tha pariat zingah hian kan lo la tel pha lo a ni ang e,” a ti bawk.
American 10th seed Madison Keys chuan an ram chu kumin World Cup-ah tel lo mahse inkhel a en zel tho tih a sawi a. Kuminah chuan England chu a tan deuh ber nia sawiin, Colombia nen an inkhel pawh kha junior Wimbledon champion lo ni tawh Laura Robson nen an en dun nia sawiin, an pahnihin an au bengchheng hle niin a sawi a ni.
Russia rama World Cup khelh chuan Wimbledon-a tel player pahnih tan harsatna a siamsak thei dawn niin a lang a, July 15 ah World Cup final an khel dawn a, hemi hma deuh lawk hian Wimbledon mipa final pawh an khel ve dawn a. Hetianga final an khelh rual dawn avang hian rilru buai tak tak chu an awm phah nual dawn a ni.
All England Club commercial and media director Mick Desmond chuan Wimbledon khelh dan tur chu thlak danglam an tum lem loh thu a sawi a, hemi chungchang hi FIFA nen pawh an sawiho tih sawiin, tournament pahnihte chu ruahman lawk anga kalpui zel a nih tur thu hi a sawi a ni.