​Wimbledon semi-final ah Federer vs Nadal

11th July 2019, 02:07PM

Wimbledon khelh mekah Men’s Singles lamah Quarter-final khelh zawh a ni ta a, semi-final khel tur hriat tawhin, semi-final ah hian khawvel hmuh chak em em mai a thleng dawn.

Tennis chanchina player ropui ber pahnih Roger Federer leh Rafael Nadal-te chuan Quarter-final a an tumpuite an hneh ve ve avangin semi-final ah an intum dawn a, kum 2008 hnuah a vawi khat nan Wimbledon-ah an inhmachhawn leh dawn a ni.

Federer hian Quarter-final ah Kei Nishikori chu 4-6, 6-1, 6-4, 6-4 in a hneh a, hei hi Wimbledon-a a vawi 100 chakna chiah niin Grand Slam pali te zinga Grand Slam pakhata century siam thei hmasa ber a ni. Nadal hian Quarter-final ah Sam Quarrey chu 7-5, 6-2, 6-2 in a hneh ve bawk.

Sawi tawh angin heng tennis player ropui pahnihte hi Wimbledon-a an inhmachhawn hnuhnun ber chu kum 2008 Wimbledon final kha a ni a, hemi tum hian Nadal hi set nganaah 9-7 in a chaka, a champion. Hemi tum hian darkar sarih dawn an inkhela, ruah a sur bawk a nih kha. Kum 2008 Wimbledon final-a Nadal leh Federer-te intum hi Wimbledon chanchina game hmuhnawm ber leh ropui ber anga ngaih a ni hial.

Federer hi Wimbledon-ah a ropui ber a, he Grand Slam hi vawi riat ngawt la tawhin Nadal hian vawi hnih a la ve tawh bawka, Wimbledon an lak tawh zat belhkhawm hi 10 lai a ni hem mai!

Federer leh Nadal-te hi vawi 39 an intum tawha, head-to-head ah Nadal chungnung daih zawkin Nadal hian 24-15 in hma a hruai mek. Grand Slam bikah kum 33 mi Nadal hian kum 37 mi Federer hi vawi 10 lai a hneh tawh a, Federer hian Nadal hi Grand Slam bikah vawi thum chiah a la hneh ve thung.

Semi final lehlamah Tennis player ropui dang Novak Djokovic a inlan dawn bawk a, Wimbledon-a vawi li champion tawh Djokovic hian Quarter-final ah David Goffin chu 6-4, 6-0, 6-2 a hnehin semi-final ah a invaw kaia, semi-final hian hian Bautista Agut a hmachhawn ve thung dawn. Agut hian semi-final lut tur hian Quarter-final ah Guido Pella chu 7-5, 6-4, 3-6, 6-3 in a hneh ve bawk a ni.

Kumin Wimbledon semi-final ah tennis chanchina player ropui ber pathum Federer, Nadal leh Djokovic te kan hmu vek dawn a, kum 12 hnuah a vawi khat nan an pathum hian Wimbledon semi-final an luh leh vek vawi khatna a ni.

Kum 15 chhung teh meuh mai, Federer emaw Nadal emaw Djokovic emaw tal Semi- Final luh lohna Grand Slam hi a awm lova, a awmzia chu a zawnin Grand Slam 61 chhung zet chu semi- final ah tu emaw ber tal hi an inlan ziah tihna a ni.

Copyright © inkhel.com 2024. All rights reserved.