Wimbledon khelh mekah tennis chanchina player ropui ber pahnih Roger Federer leh Rafael Nadal-te chu semi-final ah an inhmachhawn a, Federer hian Nadal hi hnehin final-ah a invaw kaia, final-ah hian Novak Djokovic nen an inhmachhawn ang.

Thlaleha kum 38 tling mai tawh tur Federer hian kum 33 mi Nadal hi 7-6 (7-3), 1-6, 6-3, 6-4 in a hneha, a vawi 12 nan Wimbledon final a khel dawn.

Inkhel hmuhnawm takah Federer hian awlsam lo takin set hmasa ber a la a, Nadal hian second set hi awlsam taka la in second set-ah Federer a khel chhe hle. Federer hian set thumna leh set lina te chu harsa lutuk lovin a la leha, hnehna a chang zui.

Federer hi Wimbledon-ah vawi riat teh meuh mai a champion tawh a, ani aia Wimbledon-a champion hnem hi mihring fapa zingah an awm lo. Federer-a’n a hneh tak Nadal hi Wimbledon-ah vawi hnih a champion ve tawh bawka, a vawi thumna tur chu kuminah a ni dawn ta lo.

Federer hi tennis player awm tawh zawng zawnga ropui ber a ni a, Grand Slam 20 lai la tawhin ani aia Grand Slam la hnem hi mipa an awm lova, amah hnaih ber tu Nadal hian Grand Slam 18 a la ve tawh thung.

Kum 38 tling teuh tawh hle mahse Swiss player ropui Federer hian Wimbledon final a la thleng thei a, a champion zui lovang tih pawh a sawi theih loh.

Semi-final lehlamah Djokovic hian Bautista Agut chu 6-2, 4-6, 6-3, 6-2 in a hneh ve bawk a, final-ah hian Wimbledon final-a vawi hnih a lo hneh tawh Federer a hmachhawn dawn a, a vawi nga nan Wimbledon-a champion a tum dawn a ni.

Final hi tun Sunday (14/7/19) tlai dar 6:30-ah khelh a ni ang.