2015 Wimbledon ni hnihnaah Murray, Nadal, Federer leh Kvitova te an inlan a, anni ho hian an khingpuite an hneh vek a ni.

2013 champion leh third seed Andy Murray chuan darkar hnih leh minute 13 chhungin Kazakhstan mi Kukushkin chu 6-4 7-6 (7-3) 6-4 chu south west London-ah a hneh a, Kukushkin hi World number 59 niin, Murray hian harsatna a tawk teuh thin hle. Second Round-ah Andy Murray hian Alejandro Falla hnehtu Dutchman Robin Haase a hmachhawn dawn a ni.

Roger Federer pawhin awlsam takin minute 67 chhungin debutant Damir Dzumhur chu 6-1 6-3 6-4 in a hneh a. Kum 29 mi Nadal chuan Court One-ah 6-4 6-2 6-3 in awlsam takin Thomaz Bellucci a hneh bawk. Hmeichhe lamah champion lai Petra Kvitova chuan Centre court-ah minute 35 lek chhungin 6-1 6-0 in Kiki Bertens a hneh a, hetih lai hian nikuma runner up Eugenie Bouchard erawh China mi Ying-Ying Duan 7-6 (7-3) 6-4 a hneh lovin a tla nghal a ni.