01 Jul 2019 04:34

inkhel

Wimbledon leh thawmhnaw var

Khawvela tennis hmanga inelnaah chuan a lian leh ropui bera sawi thin Wimbledon Championships chu an tan leh ta a. He inelna leh a dangte hi kawng tam takah an inang lo hle a, a bikin Wimbledon hi kalphung a danglam angreng hle.

1877 atanga khelh tawh, inelna lianah hian inelna dang zawn aiin an thawmhnaw chungchangah an duh khirh a. Wimbledon-a tel reng rengte chuan inthuam dan kalphung inang vek an zawm a ngai thin a. Court chhunga player an lut dawn a nih chuan thawmhnaw var vek an inbel tur a ni.

Thawmhnaw var han tih pawh hian tlema var tha lutuk lo chu an pawm lo a, var tha tak tak chauh hak an remti a, off-white emaw, cream rawng emaw te chu pawm a ni lo a. Hei mai bakah hian an kawr nghawng, kawr ban leh lu hrenna rawng vel chungchangah pawh duh dan bik te an nei bawk.

An thawmhnaw tial lai a awm a nih pawhin a tialna chu centimetre khat aia chhah chu an pawm lo a, an thawmhnawa logo vel awm pawh he inelna buatsaihtute hian an duh lo bawk a ni.

Wimbledon huang chhunga dan thenkhat han thlir kual ila.

Incheina
He tournament khel turte tan thawmhnaw var chauh hak tur tih hi 1800 chho vel atanga bul tan niin, hetiang hun lai vel hian mi chuan puipun nikhuaah tennis hi an khel thin a ni.

A tir taka thawmhnaw var an hak chhan chu an inkhelhin an thlan te a lo tla a, thawmhnaw rawng dangah chuan an thlan huh vel chu a langsar lehzual a, a langsar lo ber thawmhnaw var hak hi an ching chhuak ta niin Valerie Warren chuan Tennis Fashions: Over 125 Years of Costume Change ah a sawi fiah.

Valerie Warren chuan, “A tirah chuan thlan tla vel kha a buaithlak lai ber a ni a, a lansarh loh dan ngaihtuah kha an tan a pawimawh ber a ni,” a ti.

“Hun a kal zel a, thiamna te a sang chho zel a, game pawh a hautak tial tial a. Hetianga inkhel boruak a san tak zelah chuan thlan pawh a hma aiin a chhuak hnem telh telh bawk a. Thawmhnaw val kelh kulh a awm loh nan tiin thawmhnaw rawng var hak hi an ching chho ta zel a ni,” a ti bawk.

Warren chuan a tirah thawmhnaw var kher hak chu hmeichhe ho tan an ti phawt nia sawiin, hmeichhe thlan tla chu thil inhmeh lo tak nia an ngaih avanga hetiang ngaihdan nei tan hi an nih thu a sawi.

Wimbledon dan
2014 ah khan Wimbledon chuan dan thar bung 10 an siam thar a, hetah hian player te chuan an inkhelh dawna thawmhnaw var chauh hak tur tih bakah thil dang pawh an belh bawk a ni.

Dan thar an siamah hian thawmhnaw var han tihah pawh eng anga var nge tih te an sawi chiang lehzual a, a var nazawng chu hak a rem tawh lo bawk a. Tunah phei chuan rawng var an duh dan hi a fir chho tial tial tawh a ni.

An dan hman mekah chuan an kawr nghawng a tial a nih pawhin rawng chi khat, centimetre khat aia chhah lo chiah phal a nih thu an dah a. Hetiang bawk hian an kawr ban, an lu hrenna leh kekawr bul leh pawnfen velah pawh a ni bawk.

Wimbledon thuneitute chuan kekawrte lang thei pawh rawng var vek a nih a ngaih thu danah hian an telh a, rawng dang hak hi an phal lo bur bawk a. Lukhum, lu hren, bandana, ban hren leh pheikhawk thlengin rawng var vek a nih a ngai a ni.

Tun hmaa Wimbledon champion lo ni tawh Pat Cash pawh vawi khat chu dan an siam that tum hian veteran inelnaah a tel a, mahse a pheikhawk bun chu dan phal loh a nih avangin a buatsaihtute chuan inhnukdawk turin an tih phah a ni.

Pat Cash hian dan thar an hman hi a duh loh thu sawiin, he dan an hman chhan ber nia a hriat chu hmeichheho chu kekawrte ha loa khelhtir an duh vang niin a sawi chhuak.

Grand Slam dangah
Tennis inelna sang dangah pawh inchei dan tur eng eng emaw ruahmanna chu a awm tho a, Grand Slam dangah hian Wimbledon ang em em chu a awm loa ngaih a ni.

US Open-ah pawh a hma chuan thawmhnaw var vek inbel tura tih a ni tawh a, 1972 khan he dan hi an thlak danglam leh thung a, thawmhnaw rawng dang pawh hak an phal zui tawh a ni.

French Open-ah chuan Wimbledon ang taka khirhin dan an siam ve hran lo a. Tennis Australia chuan tlemin an duh khirh ve deuh a, Australian Open-a tel turte thawmhnaw chungchang hi tih bik deuh chu an nei ve bawk a ni.

Australian Open-a tel turte chuan tennis khel turte hak atana mawi inbel ngei ngei tur tiin an dah a, lukhum leh lu hrenna vel pawh umpire-in rem a tih dan azira inbel an phal a ni.

Player te kawr banah chuan logo pakhat chauh dah an phal a, an lukhum vela logo emaw, milem emaw a awm a nih pawhin tennis kaihhnawih chauh tihlan an phal bawk a ni.