Wimbledon chuan lawmman an tipung dawn a, kuminah chuan nikum aiin lawmman dawn tur hi 7.6% zetin a pung tawh dawn a ni.

Grand Slam tournament upa ber buatsaihtute chuan kuminah lawmman chu £34 million ($46.57 million) a nih tur thu an sawi a. Mipa champion leh hmeichhe champion te chuan £2.25 million ve ve an dawng dawn a, 2017 champion Roger Federer leh Garbine Muguruza te khan £2.2 million ve ve an dawng a ni.

A buatsaihtute chuan inhliam chunga inkhel lui te, inkhelh laklawh laia bansan te chu an lawmman dawn tur pek an nih loh tur thu an sawi a. Nikum khan player thahnem takin sawi lawk si loin an chawlhsan nual a, khatiang kha a thlen tawh lohna turin hetiang hian hma lak an tum phah a ni.

“First round vela inhnukdawk an tam em avangin hma lak tha kan ti a, hetiang hian thutlukna kan siam ta a ni,” tiin Wimbledon chief executive Richard Lewis chuan a sawi.

Wimbledon 2018 lawmman hian kumin January thlaa Melbourne khawpuia Australian Open an khelh tuma lawmman chu a khum a, Australian Open lawmman kha 55 million Australian dollars ($41.32 million) a ni a, tun thla tawp lama French Open lawmman erawh pawisa hlutna dinhmun atanga chhut chuan a tluk rih lo a, French Open lawmman tur hi 39.2 million Euros ($47.18 million) a ni.

Kumin August thlaa neih tur U.S. Open lawmman tur hi an la puangzar ve rih lo a. Grand Slam tournament zinga grass chunga khelh awm chhun Wimbledon hi July 2 atanga July 15 chhunga khelh tur a ni a. Kumin hi Wimbledon kum 150-na a nih bakah Open tennis kum 50 an khelhna niin, hmeichhe lampang inelna an neih kum 125-na a ni bawk.