13 Jul 2019 08:48

inkhel

Wimbledon-ah Simona Halep a champion

Simona Halep chuan Wimbledon hmeichhe singles final-ah Serena Williams a hneh a, a vawi khatna atan All England Club title a la.

Inrinnia final khelhah hian 7th seed Simona Halep chu a tir atangin a che tha nghal hle a, set khatnaa game hmasa pali chu a la nghal vek a ni.

Vawi 7 ngawt Wimbledon title lo la tawh Serena chu Romanian star Halep hian a tir game li chhung hian vawi hnih a break hman a. Set khatna hi Halep chuan harsa lo takin 6-2 in a la zui ta a ni.

Set hnihna an khel leh a, Serena Williams chu a hma ai chuan a rawn che tha chho a, set hnihnaa game li an khelh hnuah game hnih ve ve an la a, 2-2 a la ni a. Game 5-na an khelh leh chiah atangin Halep chu a vung chho leh hle a, a tawpah set hnihna pawh a hma ang chiahin 6-2 bawkin a la leh a ni.

Minute 56 chhung an inkhel a, kum 27-a upa Simona Halep chuan Serena Williams chu 6-2, 6-2 a hnehin, a vawi khatna atan Wimbledon champion a ni a. Halep hi Romanian zingah chuan All England Club-a champion thei hmasa ber niin, a vanglaia Grand Slam title a lak vawi hnihna a ni.

Serena Williams chuan Grand Slam title 23 a lo lak tawh belhchhah tum viau mahse a thil tum chu a puitlin thei ta lo a, title 24-na la tur chuan a la nghah leh deuh a ngai ta a ni.

Chak lo mahse Serena chu record neitu a la ni reng tho a, professional era bika major singles title la hnem ber a la ni tho a, amah hnaih bertu Steffi Graf aiin title pakhatin a la sang tho a. Margaret Court chuan amateur era-ah Grand Slam singles title 13 lain, a pumpuiah title 24 chu a la ve bawk a ni.

Kumin hmeichhe final-ah hian nikuma French Open title latu Romanian star Simona Halep hian unforced error pathum chiah a neih laiin, American star Serena Williams chuan vawi 25 ngawt a nei thung a ni.