Maria Sharapova chu Wimbledon-ah inlar leh a, mahse beisei angin boruak a nei lian lo a, a match khelh hmasak berah a chak lo nghal.

Sharapova hi 2015 Wimbledon-ah khan telin, semi final a thleng a. Hemi hnu hian a taksaah damdawi hman phal loh meldonium an hmu a, hei vang hian thla 15 chhung inkhel thei lo turin an hrem a. Kumin hi an hrem hnua Wimbledon a khelh leh hmasak ber a ni.

Nikum khan Sharapova hi a inhliam avangin Wimbledon-ah a tel lo a, kuminah Russian nula Vitalia Diatchenko nen an inkhel a, kum 31-a upa Sharapova hi a tlawm zawkah a tang zui a. Court Two-a darkar thum chuang an inkhelh hnuah Vitalia Diatchenko hi 6-7 (3/7), 7-6 (7/3), 6-4 in a chak a, grass court bika Grand Slam khelha a chak vawi khatna a ni.

Tennis atanga £30 million vel bawr lalut, 2004 Wimbledon champion Sharapova hi Wimbledon first round-ah a la tla ngai lo a, kumin hi a vawi khatna a ni a. World no. 132 Diatchenko hi qualifier niin, Sharapova nen an inkhelh hma hian Grand Slam match ah vawi hnih chiah a la chak ve a ni.