Zanin hian FIFA World Cup khelh mekah England leh Colombia te an inkhel dawn a, an inkhel hi Wimbledon-ah chuan en theiha tih chhuah a ni dawn lo.

Wimbledon khelh mek a ni a, kuminah World Cup nen a inrual mai bakah England inkhel nen pawh a inrual zui a. A buatsaihtute lampang chuan kumin chu World Cup nen inchiahpiah loh ni se an ti a, zanina England leh Colombia te inkhel pawh en theiha tih chhuah an tum lo a ni.

Court One pawn, Henman Hill epah inkhel en theihna lianpui an dah a, a chhunga enna chang lo te chuan helaiah hian tennis khel hi an en mai thin a. All England Lawn Tennis Club chuan Wimbledon-ah hian football khel an lo tichhuak tawh thin a, a hnuhnung ber chu 1996 kha niin, European Championships khelh niin England inkhel chu TV lian atang hian an lo tichhuak tawh a ni.

Gareth Southgate-a pawlte chuan match pawimawh em emah Colombia an hmachhawn dawn a, tennis khel en tura Wimbledon pantu, England inkhel en duh si te chuan hmun dang an pan emaw, an mobile phone atanga inkhel an en emaw a ngai dawn a ni.

Richard Lewis, AELTC CEO chuan, “Kum dangah pawh football hi kan tichhuak ngai lem lo a, European Championship a ni emaw, FIFA World Cup a ni emaw, tihchhuah kher hi tul kan ti lo a. Kuminah pawh he ngaihdan hi kan la thlak danglam dawn lo a ni,” a ti a.

“Helai hmun rawn pantute hian tennis inelna hmun a ni tih an hre chiang a, football en kha an rawn beisei kher lem lo a, tennis bak en tur a awm lo tih hi an thinlungah a intuh nghet tawh a. Tunhma atang tawhin hei hi kan kalphung a ni a, sawisel a hlawh ngai lo a, a nih dan tur rengah an ngai vek a. England inkhel en hi nuam kan ti vek a, Gareth Southgate leh a pawlte hi World Cup-ah che tha zel se kan duh a ni,” a ti bawk.