29 Jun 2019 04:23

inkhel

Wimbledon 2019 a thil thar awm turte

Wimbledon 2019 chu July 1 atang hian London khawpuia All England Lawn Tennis Club-ah an khel tan tawh dawn a, tennis inelnaa ngaihsan hlawh ber pawl tih theih hi Thawhtanni atangin en tur a awm leh tan ang.

Kumin atang hian Wimbledon chungchangah thil thlak danglam a awm nual a, a hmaa an tih ngai loh tih thar, kalphung her danglam hret hret eng eng emaw a awm a, chutiang zinga langsar zual tlem han thlir kual ila.

1. Lawmman a pung
Kumin atang hian lawmman lak tur pawisa fai chu tihpun a ni a, a hmaa pawisa awm aiin kuminah hian 11.8% ngawtin a tam tawh zawk a, lawmman lak theih tur hi a vaiin £38 million zet a tling.

Mipa leh hmeichhe singles champion te chuan £2.35 million ve ve an dawng dawn a, hei hi nikum lama champion te dawn aiin £100,000 in a tam zawk a. Hei bakah hian first round pal tlang thei ta lo player te pawhin £45,000 (Rs. 39,38,964.47) zel an dawng dawn a ni.

2. Final set-ah tie break
Wimbledon Championship chanchina a vawi khatna atan final set-ah tie break a awm dawn a, 12-12 a nih chuan match rei lutuk tur ven nan tie break awmtir mai turin thu an titlu a. Heti a nih chuan Grand Slam tournament pali awmah final set-a point hmuh inang chin fel dan chi hrang theuh a awm dawn tihna a ni.

3. Inkhel an tan hma dawn
A hma ang lo deuhin kuminah chuan Centre Court leh Court One a khelh tur ni lo, court danga khelh turte chu a hmaa an tan hun aia darkar chanvea hmaah an khel tan tawh dawn a. London Time-a chawhma dar 11:30 a khel tan tawh loin, chawhma dar 11:00 ah zel an khel tan tawh ang a. Mipa leh hmeichhe singles final chu kar tawpah chawhnu dar 2:00 ah an khel ang.

4. Ei leh in tihna hmun thar
Tun tumah hian ei leh in lampang tihna hmun tur a hranpain an siam thar a, court piah chhim lamah ei leh in tur awmna hmun hi an dah a, hetiang lampang mamawh tan pan awlsam turin an siam a ni.

5. Environment-friendly
Wimbledon 2019 chu eco-friendly a nih theih nan tiin a huaihawttute chuan Evian tui um chiah an zuar dawn a, hetiang tui um hi 100% recycled leh recyclable an ni a. Hetiang tui um chiah an hralh dawn bakah racket hrui pawh plastic bag-ah an thun tawh dawn lo a ni.

6. Court One in chung inkhar thei
Court One chung chu kuminah an hawng dawn a, inkhelh laklawh laia ruah a sur a nih pawhin a chung chu an khar ang a, inkhel a tibuai tawh dawn lo a ni.

7. Hmeichhia an pung
Kuminah hian hmeichhe singles bikah a hma zawng aiin tel an tam zawk a. Tel thei zat an tipung nasa hle a, nikumah khan 96 an tel laiin kuminah chuan hmeichhe singles-ah hian 128 ngawt an tel a, mipa tel zat nen an inzat chiah a ni.

8. Quad wheelchair match a tam belh dawn
Nikum Wimbledon-ah khan quad doubles wheelchair tennis exhibition tournament chauh an ti tel a, kuminah erawh quad singles leh quad doubles match te an ti tel dawn a, July 8 hian an khel dawn a ni.