Brazilian winger Willian chuan Chelsea-a a contract a hmang zova, tunah hian free agent niin, Arsenal lam a pan dawn.

Sky Sports tarlan danin Willian hian tunkar Inrinni hma ngei hian Arsenal a zawm fel hman dawna, Zirtawpni hian medical neiin, Arsenal-ah kum thum daih contract ziak tura ngaih a ni.

Kum 32 mi hian kum sarih chhung a khelhna Chelsea a chhuahsan fel tawha, Chelsea pawh hian thlahna thu an dah chhuak tawha, London chhuahsan lovin, North London lamah Willian hi a insuan dawn.

Arsenal bakah Barcelona leh MLS lam club Inter Miami te pawhin Willian hi lakluh an duh nia sawi a ni a, mahse Willian hian a inbengbel tawhna sa London chhuahsan loh dan a dap avangin Arsenal hian an chang niin a lang.

Willian hian tun season khelh zawh takah khan Chelsea tan game 47 a khela, Premier League bikah goal kua khungin, Chelsea player pawimawh ber zinga mi a ni.

Chelsea hian Willian hi kum hnih daih contract zawrh mahse Willian hian kum thum daih contract ziah a duh tlat avangin inremna an nei thei lova, a contract a hmang zo ta a ni.