Serena Williams leh Venus WIlliams te chu French Open women’s doubles a tel thei turin wildcard pek an ni.

Williams unau te hi pair 6 an sawm zinga pair khat niin, anni hi Paris ah hian vawi 2 an lo champion tawh a. Grand Slam title 14 an lak zingah 1999 leh 2010 a Roland Garros title an lakte hi a tel a ni.

2010 a title an lak hnuah Roland Garros-ah hian vawi hnih chiah an la inlan leh a, 2013 khan first round-ah an tla a, 2016 ah khan tel lehin third round-ah an tla bawk a. 2016 khan Wimbledon-ah an champion a, hemi hnu hi chuan grand slam event-ah an la khel dun leh ta lo.

Serena chuan French Open singles a khel dawn bawk a, a rai tantirh laiin 2017 Australian Open-ah a champion a, hemi hnu hian inelna lian thamah a tel leh ta miah lo a. Nikum September thla khan a fa hmasa berah hmeichhia a nei a, tunah chuan tennis a khel chho leh tan tawh a ni.

Champion lai Lucie Safarova leh Bethanie Mattek-Sands te chuan midang an kawp ve ve tawh dawn a. Safarova hi Svetlana Kuznetsova nen an inkawp ang a, American star Bethanie chu world number 1 Latisha Chan nen an inkawp thung ang.

Russian pair Ekaterina Makarova leh Elena Vesnina te pawh an inthen a, Makarova hian Anna Kalinskaya a kawp tawh ang a, doubles ranking-a pahnihna Vesnina chuan singles champion lai Jelena Ostapenko a kawp ve bawk dawn a ni.