Nico Williams chuan Barcelona sawmna hnawlin, Athletic Club-ah kum 2035 thleng atan contract thar a ziak ta zawk.

July ni 4, 2025 (Zirtawpni) khan Athletic Club chuan thuchhuah siamin, Spain international hian kum 2035 thleng atan contract thar a ziah thu an tarlang a, a hmaa a release claus kha €60million (£50m, $62m) a ni a, a contract tharah hian release clause chu 50 per cent laiin a pung a, a release clause thar chu €90m lai a ni ta hem mai.

Thla hmasa khan Barcelona leh Nico Williams te chuan contract chungchangah inremna an lo nei tawh a, hetih lai hian Catalan Club hian sum lama harsatna an neih avangin registration chungchangah buaina an tawk a nih kha.

"Thutlukna siam a ngaih hi chuan, thluak aia thinlung duhzawng thlan hi a pawimawh a ni. Ka duhna hmunah chat ka awm, ka mite kiangah ka awm a, hei hi ka in a ni. Aupa Athletic," tiin Nico Williams chuan contract thar a ziah zawhah a sawi.

Nikum nipui bazar inhawn lai khan Barcelona khan nasa takin Nico Williams hi an bawhzui a nih kha. Arsenal, Chelsea, PSG leh Liverpool te pawhin an ngaihven bawk. Mahse Athletic president Jon Uriarte chuan, "Kan player tha ber Nico Williams chelh turin sum kan ngah ve tawk," tiin a lo sawi a nih kha.

Williams hi Athletic Academy chhuak a ni a, kum 2020 khan kum 18 mi niin senior team-ah a vawi khat nan a inlan a, Athletic tan hian game 167 a khel tawh a, goal 31 khung tawhin, assist vawi 30 a nei tawh bawk.

Kum 2022 September thla khan Spain tan a vawi khat nan a inlan a, ram tan vawi 28 a inlan tawh. 2022 World Cup squad-ah khan a tel ve a, 2024 European Championship-ah pawh khan Spain tan inlanin, no mawi a chawi nghe nghe.