Deontay Wilder leh Tyson Fury te chu boxing ring chhungah an inhmachhawn dawn hnai niin an sawi a, tun atanga thla thum velah chuan anni pahnih inhnek hi kan en thei dawn niin an sawi.
Showtime Sports president Stephen Espinoza chuan Deontay Wilder leh Tyson Fury te chu an inhnek teuh tawh hle niin a sawi a, anni pahnih inhnek hi Showtime PPV-ah an tihchhuah dawn avanga hre chiang a nih thu sawiin, kumin November 10 ah emaw, November 17 ah emaw Las Vegas khawpuiah an inhnek dawn thu a sawi a ni.
Espinoza chuan, “A hnai tawh.. Hnai tawh tak a ni. Tunah tak chuan Tyson leh Deontay te leh an promoter te chuan engmah la sign lo mahse a hun a thleng dawn hnai hle,” a ti.
“95% a ni emaw, 99% a ni emaw, a hnai tawh a ni tawp mai a ni. Ziah fel ngai apiang chu reiloteah kan ziak fel vat turan kan ngai a, chumi hnuah chuan engkim kan buatsaih chho tawh ang a. Fans te chuan ennawm nghahhlelhawm tak hi an nghak chhuak dawn hnai tawh e,” tiin a sawi bawk.
Wilder-a co-manager Shelly Finkel leh Fury promoter Frank Warren te pawhin tun hnaiah he inhnek nghahhlelhawm tak hi a tak ram a thleng tep niin an lo sawi tawh a. He bout hi a taka thleng thei turin thla khat vel bawr an indawr tawh a, inremna an nei hnai tawh hle niin an sawi.
Deontay Wilder hian Anthony Joshua hmachhawn thei turin hma a la vak a, mahse a theih dawn tak loh avangin Tyson Fury lam hi a hawi leh a. Anthony Joshua hian boxing khawvela inhnek ropui ber ti hiala sawi theih tur thlentir ai chuan September 22 khian Alexander Povetkin hmachhawn a thlang zawk a ni.
Wilder leh Fury te hian inremna siam pawh ni se, August 18 khian Fury chuan ring chhungah chak hmel a hmuh leh phawt a ngai a. Hun rei tak a chawlh hnua rawn kir leh Fury hi vawi khat a inhnek tawh a, a chak nghal a. August 18 ah Belfast, Northern Ireland-a Windsor Park-ah Francesco Pianeta (35-4-1, 21 KOs) chu a hneh phawt loh chuan Wilder nen hian an inhnek thei dawn lo a ni.
Kum 32-a upa Wilder (40-0, 39 KOs) hi Tuscaloosa, Alabama chhuak a ni a, a title kawl hi vawi 7 ngawt mai a lo humhim tawh a. January 2016 khan Brooklyn, New York a Barclays Center-ah Wilder hian round 9-naah Artur Szpilka a knock out a, a title a hum thei a. An inhnek entu Tyson Fury hi ring chhungah tlan lutin Wilder nen hian hmai insi deuh retin an indinchilh hman a ni.
Fury (26-0, 19 KOs) hi kum 29 a upa niin England a seilian a ni a, world title belt pathum nei tawhin, November 2015 khan Wladimir Klitschko chu a hneh a, a title a laksak bawk a. Mahse, title humhim tura a inhnek zui loh avangin a title hi an hlihsak leh a. Kum hnih leh a chanve zet inhnek a chawlhsan hnuin June 9 khan boxing ring-ah a kir leh a, Sefer Seferi chu round 4-naah a knock out a ni.