08 Dec 2018 01:17

inkhel

Wilder vs Fury 2 a awm dawn: WBC

World Boxing Council te chuan Deontay Wilder leh Tyson Fury te chu inhnek tir leh ngei an tum a, Wilder leh Fury te hi a hma thei ang bera inhnek tir leh a, tuna chanchin sawi hlawh em em pawh hi a reh theih an beisei.

Los Angeles khawpuia heavyweight boxer pahnih Deontay Wilder leh Tyson Fury te inhnek khan sawi a hlawh zui hle a, judge pathumte point pek an belh khawm chuan an inhnehtawk tlat mai a. Wilder chuan Fury chu vawi hnih hnek tlu mahse a pumpuiah Fury chu chak zawk tura ngaitu an tam hle a, hei vang hian result chuan mak tih pawh a hlawh viau reng a ni.

Kar hmasaa Staples Center-a round 12 an inhnek hnua an inhnehtawk avang hian boxer pahnihte chuan inhnek that leh an duh thu an sawi chhuak ve ve a. Hei mai bakah hian promoter lam pawhin WBC hnenah hian lehkha thehlutin result sawisel bo a awm theih nan inhnek thattir leh turin an ngen bawk a ni.

WBC chuan ngun takin WBC heavyweight champion Deontay Wilder leh a title chuhpuitu Tyson Fury te inhnek nawntir chungchang hi an ngaihtuah a. Board of Governors te chuan ngun taka an ngaihtuah hnuah inhnektir leh ngei ni se tiin thutlukna an siam ta a ni.

“Wilder leh Fury te khan heavyweight bikah chuan hun rei tak kan lo hmuh tawh loh, inhnek hmuhnawm em em mai min hmuhtir a, boxing ngainatute pawhin an ngaihven lehzual hle a. Fans te chuan inhnek thattir leh turin min beisei phah hle reng a ni,” tiin WBC chuan thuchhuah an siam a.

“WBC chuan inlungrual takin Deontay Wilder leh Tyson Fury te hi inhnektir leh ni se tiin thutlukna a siam a, thil kimchang zawk chu nakina inhriattir zui leh zel a ni ang,” tiin an tarlang.