Wilder rematch an duh loh chuan Anthony Joshua a ni mai: Fury

24th February 2020, 10:02PM

Tyson Fury chuan Deontay Wilder nen rematch neih leh theih ngei a beisei thu sawiin, Deontay Wilder te hian an duh ta lo a nih tak leh Anthony Joshua nen an inhnek tur thu a sawi.

Pathianniah khan Tyson Fury leh Deontay Wilder te chu Las Vegas khawpuiah an inhnek a, round 7-naah TKO in Fury hi a chak a, hemi hnuah hian Wilder nen rematch neih leh a duh thu pawh hi a sawi chhuak a ni.

Fury chuan, “Boxer ropui tak Deontay Wilder ka hmachhawn thei a, hun duhawm tak kan hmang dun thei kha a lawmawm a. Engtikah emaw chuan Wilder nen hian kan inhmachhawn leh ngeiin ka ring tlat a ni,” a ti.

“Deontay hian rematch neih leh a duh lo a nih tak chuan hmun dangah ka hawi a ngai dawn tihna a ni ang a, Anthony Joshua nen kan inhnek mai a ngai dawn a ni,” a ti bawk.

Wilder nen an inhnekah khan Fury (30-0-1) chu a chungnung hle a, WBC lallukhum chu Wilder (42-1-1) a chhuhsak chiang hle a. Title dang zawng chu Anthony Joshua chuan a kawl vek a, hei hi Fury chuan chhuhsak theih ngei a duh hle.

Anthony Joshua leh Tyson Fury te an inhnek thei a nih ngat chuan khawvel huapah pawh a tla na dawn chiang sa a, a chak zawk chuan title an kawl vek thei dawn a. British boxer ropui pahnih an inhmachhawn hma hian Fury leh Wilder te hi an inhnek leh phawt thei bawk a ni.

December 2018 ah khan Tyson Fury leh Deontay Wilder te chu an lo inhnek tawh a, khami tumah khan chak zawk an awm lo a, sawi a hlawh hle nghe nghe a. Pathiannia an inhnek lehah chuan British boxer Fury chu a chungnung chiang hle a ni.

Deontay Wilder chuan Tyson Fury nen a vawi thumna atana inhnek leh chu a duh leh duh loh tih chianna hun ni 30 chhung a nei a, hemi hun chhung hian a duh dan a sawi chian hman a ngai dawn a ni.

Copyright © inkhel.com 2024. All rights reserved.