American heavyweight boxer Deontay Wilder leh Cuban heavyweight boxer Luis Ortiz-te chuan kuminah rematch an nei dawn tih a chiang tawh.

Wilder leh Ortiz-te hi nikum March thla khan New York khawpuiah, Barclays Center-ah an lo inhnek tawha, hemi tum hian Wilder hi technical knock-out hmanga chakin a WBC heavyweight title a humhim.

Heavyweight boxer pahnihte hi kumin November thla ni 23-ah Las Vegas-a MGM Grand-ah an intawng leh dawn a, ngaihven a hlawh chho nghal viaua, sum pawh a tam hle tura ngaih a ni.

WBC heavyweight champion lai Wilder hian hneh loh a la nei lova, Tyson Fury nen an inhnehtawk tih loh chu la chak vekin vawi 41 lai hnehna a chang tawh. Ortiz pawh a theuneu bik hauh lova, nikuma Wilder a hneh loh bak hi hneh loh a la nei bik lova, vawi 31 lai hnehna a chang ve tawh bawk.

Wilder hi kum 2015 atang khan WBC heavyweight champion a ni tawh a, vawiin thlengin tu mahin an la chhuhsak thei lo. Ortiz lakah a title humhim nawn a tum dawn a, a hlawhtling a nih chuan nakkum kum tir lamah Tyson Fury nen an inbeih leh ngei a rinawm bawk.

Kum 33 mi Wilder hian sawilan tawh angin vawi 41 ngawt hnehna a chang tawh a, vawi 40 zet chu KO hmangin a chak tawh bawk. Ortiz nena an inhnek nawn tur chungchang sawiin Wilder chuan, “Round 12 chhung tihsual nei miah lova a khelh a ngai dawna, kei erawh ka hnek nat em avangin round hnih bak ka mamawh dawn lo a ni,” a ti.