Deontay Wilder leh Tyson Fury te inhnek hun tur chu tih chian a ni ta a, Premier Boxing Champions te chuan Wilder leh Fury te hi kumin December 1 khian an inhnek dawn tih an puang.
World heavyweight title kawltu Deontay Wilder leh world champion hlui Tyson Fury te inhnek hun tur an puanzar lai hian an inhnekna hmun tur erawh sawi chian a la ni rih lo a. Los Angeles khawpuia Staples Center leh Las Vegas khawpuia Mandalay Bay Events Center te chu buk tawn an ni a, duh zawk an la thlang fel chiah lo niin a lang.
Premier Boxing Champions thu chhuahah hian Wilder leh Fury te chuan an inhnek tur vawrh lar nan khawpui pathum an tlawh kual dawn tih an tarlang a, a bul tanna atan October 1 hian London khawpuiah an inlan ang a, chumi hnuah New York leh Los Angeles lamah an kal leh dawn a ni.
Deontay Wilder (40-0, 39 KOs) hi kum 32-a upa niin Tuscaloosa, Alabama atanga chawr chhuak a ni a. Kumin favang laia Anthony Joshua nena inhnek a duh hle a, undisputed heavyweight world championship title inchuha anni pahnih inhnek tura United Kingdom pan turin $15 million senso pawh a inhuam hman a. Mahse, Joshua leh a promoter Eddie Hearn te chuan Alexander Povetkin chu Joshua hnekpui atan an thlang ta zawk a ni.
Wilder chuan, “Kan inhnek dawn chiang ta a, a phurawm a, ka nghakhlel tawh khawp mai a. A hmuhnawm viau dawn a, boruak pawh a sang dawn khawp mai a, nakin thlenga chhinchhiah reng tlak a ni ngei dawn a ni,” a ti.
“Khawvela heavyweight boxer tha ber pahnih inhnek tur hi a nep lo viau dawn a, boxing ngainatute tan chuan hei baka nghahhlelhawm hi a awm thei tawh dawn lo a. Ka ngaihdanah chuan khawvela heavyweight boxer tha ber Luis Ortiz chu March 3 khan ka lo knockout tawh a, tunah chuan a tha ber dawttu ka hmachhawn leh dawn a ni,” a ti bawk.
Tyson Fury (27-0, 19 KOs) chu kum 30-a upa niin, feet 6 leh inches 9 zeta sang a ni a. November 2015 khan Wladimir Klitschko chu hnehin world title belt pathum a kawl a, mahse thla 31 chhung chu a inhnek zui leh ta miah lo a, hei vang hian a title kawl pawh an hlihsak vek a ni.
Fury hian boxing ring a luhchilh leh atangin vawi hnih chu a chak leh tawh a, a rawn kir leh hnuah Wilder hi mi pathum a hmachhawn lehna chiah a ni ang.
“Wilder hmachhawn turin contract kan ti fel tawh a, Deontay hian a dawng mawlh mawlh dawn a ni mai a, a tan chuan kei hi buaina ral lian ka ni ber mai a. Boxing ring chhung leh pawnah ka hneh theih loh hi ka la tawng ngai lo a ni,” tiin Fury chuan a sawi.
A sawi zelnaah, “Deontay Wilder hian a hnek na tih ka hria a, amah pawh a lian a, a tawng thei em em bawk a. Chak zawk nih a duh ngei dawn a, mahse kei kher chu a duh angin a ti thei dawn lo a, min hneh thei dawn lo a ni,” a ti bawk.