14 Feb 2020 09:19

bakteaJr.

Mizo tlangval

​Wilder ka KO a ngai: Fury

British heavyweight boxer Tyson Fury chuan American heavyweight boxer Deontay Wilder nen an inhnek leh hunah chuan a chak zawk tih a chian ngei nan Wilder chu a knock-out a ngaih thu a sawi.

Fury leh Wilder-te hi hneh loh la nei ngai lo ve ve an ni a, tunlai heavyweight boxer tha ber pahnih niin kum 2018 December thla khan an lo inhnek tawha, mahse he bout hi draw-a puan a ni.

An inhnek hmasak tum hian mi tam tak chuan Fury hi chungnung zawkah an ruata, chak zawk ngei tura ngaih ni mahse judge-te hmuh dan a nih ve loh avangin draw-a puan a ni miaua, tun thla hian an inhnek nawn leh dawn.

Fury leh Wilder te hi tun thla ni 22 (kan sana-ah chuan ni 23 zing) hian Las Vegas-ah Grand Garden Arena-ah an intum leh dawna, boruak pawh a sangin combat sports khawvel mai bakah khawvel ngaihven a ni a, heavyweight bout-a ropui ber te zinga mi ni tura ngaih a ni.

Fury chuan Wilder nen an inhnek hmasak chungchang kha sawiin, “Ka hneh zawkin ka hre ngeia, tunah chuan ka chak tih nemngheh nan leh a chian zawk nan ka knock-out a ngai. Sawisel thei  tak decision ang kha ka duh tawh lova, chiang taka chak ka duh tawh. Judge ka ni lova, anni chuan an duh chin an hmu mahse keichu ka hmabak hi ka kuttumah a innghat a ni,” a ti.

Sawi zelin kum 31 mi chuan, “Kan fight hmasa atang khan hnek fuh theih ka ni tih ka zir chhuaka, a kut dinglam hi a hlauhawma, mahse chu zawng chu a nimai, a kalkhat ve hle. Vawi hnih min hnek tlu a, minute hnih chhung min finish theihna hun a nei ve ve bawka, mahse min finish thei lo.

“Khawvela heavyweight te’n an hnek chian theih ang ber turin vawi hnih min hnek fuha, mahse ‘Gypsy King’ erawh ka dingchang. Ka tihsual lian ber ni ta chu ka hnek nat laiin ka bawhzui tawk lo kha a ni a, mahse kha tih hun lai khan ka chauh dan tawk ka hre si lova, round 12 ka inhnek lo rei tawh bawk nen ka fimkhur. Tunah erawh ka theihna zawng zawng nen ka bawhzui tawh dawna, engin nge deng pawh a hre hman tawh lovang,” a ti.