Tyson Fury chuan WBC heavyweight champion Deontay Wilder chuan theihtawp chhuahin an pahniha inhnek nawn leh chu pumpelh dan a zawn a rin thu a sawi.

Los Angeles khawpuia inhnek sawi hlawh takah Deontay Wilder leh Tyson Fury te chu chak zawk awm loin an inthen a. Professional boxer thin eng emaw zat chuan Tyson Fury chu chak zawk nih phu tih an sawi hlawm a, an inhnehtawk chu mak an ti hlawm hle.

Hemi chungchang hi sawiin Tyson Fury chuan, “Tunah tak hi chuan Deontay Wilder hian a intlansiak pheikhawk bunin, ka awmna atanga hla thei ang bera tlan vang vang a duhin ka ring a. Inhnek nawn leh tih vel chu a theih ang tawka pumpelh hram dan a ngaihtuah ngar ngar ka ring a ni,” a ti.

Deontay Wilder-a trainer Jay Deas chuan Fury leh Wilder te hi inhnek nawn leh se a duh thu chu a sawi chhuak ve ngei a. IBF, WBO leh WBA champion Anthony Joshua leh Wilder te inhnek hma ngeiin Fury nen chuan inhnek leh thei se a duh thu a sawi.

Round 12 an inhnek hnuah Wilder chuan Fury chu vawi hnih a hnek tlu a, judge pakhatin 115-111 in Wilder a chaktir a, pakhat lehin Fury chu 114-112 in a chaktir thung a, judge dang pakhat chuan 113-113 in a inhnehtawk tir thung a. American boxer Wilder chaktirtu chu judge Alejandro Rochin a ni.

Kum 30-a upa British boxer Tyson Fury chuan boxing khawvel a luhchilh hnuah khatiang taka thutlukna lak tlak loh kha a la hriat ngai loh thu a sawi a, an inhnehtawktir kha kum 33-a upa Deontay Wilder tan chuan thilpek hlu tak a nih thu a sawi.

“Kei kha chak zawk tur ka ni a, WBC belt pawh Britain lama kalpui tawh tur ka ni a, mahse America ramah a la awm ta zel a. Hneh loh kan la nei lo ve ve a, a bul atang bawkin kan ti tha leh dawn a ni tawh mai,” tiin Fury chuan a sawi.

Fury promoter Frank Warren chuan British Boxing Board of Control in WBC hnenah Fury leh Wilder te inhnektir leh tura ngenna an thawn tur thu a sawi a. An inhnek leh dawn a nih chuan London khawpuiah ngei ni tawh se a duh thu sawiin, Wembley Stadium chhungah mi 90,000 vel zetin an en thei dawn a, pawisa pawh a lut tha dawn a ni tih a sawi bawk.

World champion lo ni tawh thenkhat Floyd Mayweather, Lennox Lewis, Tony Bellew leh Carl Froch te chuan Tyson Fury chu chak zawk ni ngei tura an ngaih thu an sawi chhuak a. Heavyweight world champion hlui Lennox Lewis chuan hetiang thil hi a chungah pawh a thlen tawh thu sawiin, a rin lawk ang tak thil a thlen thu a sawi.

Lennox Lewis chuan America rama British boxer tana chak a harzia sawiin, 1999 khan New York khawpuiah Evander Holyfield nen an inhnek a, hei tum pawh hian chak ngei tura a inngaih laiin judge te chuan an inhnehtawktir tawh thu a sawi a ni.

British boxer Lennow Lewis te result chuan sawi a hlawh zui hle a, a hnuah an ihnek tha leh a, hetah hian unanimous decision in Lewis hi a chak ta reng a ni.

Lewis chuan, “America-ah chuan kan khingpuite kan knock out a nih ngawt loh chuan British boxer tan chak a harsa khawp mai. Ka chunga thleng tawh ang chiah kha Tyson Fury chungah a thleng ve a, a chak chiang viau tura ngaih a nih laiin khatiang result kha a ni ta daih a ni,” a ti.