British boxer Tyson Fury chuan American boxer Deontay Wilder chu khawvela fight ropui berah a hneh ngei tur thu a sawi.

Tun Sunday liamta mai khan Fury hian German boxer hneh loh la nei ngai lo Tom Schwarz a hmachhawn a, Schwarz hi Fury a lakah round hnih pawh a daih lo a ni ber.

Heavyweight champion hlui Fury hian hneh loh a la tawng ngai lova, nikum khan Wilder nen hian lo inhmachhawn tawhin, a chak ngei dawn emaw tih hnuah ‘draw’ a puan a ni.

Fury chuan Wilder-a nena inhnek leh chungchang sawiin, “Wilder hi ka hneh tawha, chuvang chuan ka hneh leh ngei bawk ang. Infit tha em em leh hriam hriam mai min hmachhawn dawna, boxing khawvela fight lian leh ropui ber a ni ang,” a ti.

Fury leh Wilder-te hi rematch nei turin fans lam pawhin an duh hle a, mahse promotion hran an nih avangin beisei anga awlsamin thil a rem mai thei lo.

Wilder pawh hi hneh loh la tawng ngai lo a ni a, tunah hian WBC heavyweight title a kawl mek. Fury hian WBA, IBF, WBO leh Ring megazine heavyweight title te lo kawl tawh thinin, rokhawlhna avangin heng title te hi a lo dah awl tawh.

Fury leh Wilder-te hi tunlai heavyweight boxer tha ber ngaih an ni a, Ring megazine chuan Fury hi tunlai heavyweight boxer tha berah an thlang bawk. An inhnek leh dawn a nih chuan Fury sawi ang hian a ropui hle dawna, a sum hrawm pawh a na hle dawn tih a lang chiang a ni.