27 Feb 2020 04:44

inkhel

Wilder-a’n chak loh chhuanlam a neih belh zel

Deontay Wilder chuan Tyson Fury a hneh loh chhan chhuanlam a siam belh zel a, chhuanlam hi a neih belh mek zel a ni.

Pathianniah khan Deontay Wilder leh Tyson Fury te chu Las Vegas khawpuiah an inhnek a, Gypsy King chu he inhnekah hian a chungnung zawk daih a, inhnek laklawh laiin Wilder-a trainer Mark Breland chuan ring chhungah towel a vawm lut a, referee chuan inhnek pawh a titawp zui a ni.

Inhnek laia towel vawm luttu Mark Breland chu Wilder hian a ban zui nghal a. Fury a hneh loh chhan pakhat chu an inhnek hmaa boxing ring a pan laia a inthuamna rit lutuk niin a sawi bawk a. A inthuamna a rih em avangin a ke tha a tikhawlo niin a sawi a ni.

A inthuamna a puh piah lamah hian Wilder chuan an team chu a puh tel bawk a. Chu bakah a hma atanga hliam eng emaw a neih thu te pawh a sawi lang a, hliam a neih vang chuan duh angin Fury lakah khan a chet that theih loh phah niin a sawi chhuak.

Fury nen an inhnek chungchangah Wilder chuan, “Fury khan min khawih na lo hrim hrim,” tiin a sawi a. British boxer chuan khawih na lo angin sawi mah se WBC champion tharin a hnekna avangin a hmai leh beng chu a thi chiang viau thung.

Heavyweight boxer tam zawk chu taksaa an inhnek avangin an tlu meuh lo a, hetih lai hian Fury kha chuan American boxer Wilder kha a taksaah a hnek fuh a, a tluk phah ngei thung a ni.

“Kumin nipui chhung ngeiin Tyson Fury hi inhnekpui leh ka inpeih a, a kar lakah fight dang nei miah lo thung ila. Pasaltha ka ni a, inhnek leh hi ka duh a, chutih rualin kan camp velah hian thil thlak danglam ngai erawh a awm nual thung,” tiin Wilder chuan a sawi.