Sunday kaltaa a WBC world heavyweight title hloh tu Deontay Wilder chuan a ke zawi chhan sawiin, ring a pannaa a thawmhnaw hak (costume) rih lutuk vang niin a sawi.

Kum 34 mi American heavyweight boxer Wilder hi Sunday liamta khan Tyson Fury-a lakah chiang takin a tlawma, Wilder hi round thumna vel atangin a zawi tana, Fury hian vawi hnih lai knock-down in round sarihnaah Wilder-a corner-in towel var ring chhugah vawm lutin Fury hian hnehna a chang.

Fury nena an inhnek dawn hian ring a pannaah Wilder hian indo kawr a ha a, awmphaw a inbel bakah hmaikawr vuahin lal lukhum a khum bawka, a incheina zawng zawng hi 18.1kgs-a rit niin, Black History Month hriat reng nan heti ang hian a inchei.

Wilder chuan, “Fury khan min khawih na lo hrim hrima, ka uniform kha ka tan a rih em vang zawk a ni. Kan inhnek tirh phat atang khan ka ke a zawi nghala, third round-ah kha chuan ka ke kha zawi tawh tak a ni.

“Ka uniform kha a hma zan khan a vawi khat nan ka ha chhina, khati ang em em khan a rit dawn tih ka hre lo. Nalh kha ka duh a, chu chu thil dang zawng aiin ka dah pawimawh a ni ber,” a ti.

Round sarihnaa towel var vawm lut tu hi Wilder-a assistant trainer Mark Breland a ni a, Wilder hi Breland-a chungah hian a lung a la awi lo niin a lang. Breland-a’n towel var a vawm luh chungchang sawiin Wilder chuan, “Hemi chungchang hi vawi tam tak kan sawi ho tawh avangin Mark-a chungah hian ka lung a awi lo.

“Mahse kan inhaw hran lova, keiman duhdan bik ka neih vang mai a ni. Heti ang thil thleng thei chungchang hi kum tam tak kalta atang khan kan sawi ho fo tawha, tuna a thlen hma daih atang hian kan sawi ho tawh.

“Indo mi ka nih thu ka sawi tawha, champion ka ni a, leader leh ruler ka ni bawka, a theih chhung chu inhnek ka duh a, chuvang chuan ka team hnenah pawh engti kawng maha towel vawm lut ngai lo turin ka chah fo, a chhan chu kei hi mi bik ka ni a, round nga ka la nei a, a lan dan chu eng pawh nise fight kha a la zo lo.

“Breland kha ka dinhmun a ngaihtuah vang leh ka tana tha tura a ngaih dan angin a awm tih pawh ka hriatthiam sak em em a, mahse hei hi ka nun a ni a, ka career a ni a, ka duhdan min pawm sak a ngai a ni,” a ti.

Wilder hian ni 30 chhung rematch clause tih nunna hun a nei meka, third fight a awm ngei a rinawma, Fury-a hnen atang hian a WBC title lak kir a tum ngei a rinawm a ni.