Tyson Fury chuan Deontay Wilder a hneh hnuah American boxer in chak loh chhuanlam a siam nasa kha mak a tih loh thu sawiin, a hriatthiam thu a sawi.

February 22 ah Tyson Fury chuan TKO in Deontay Wilder chu a hneh a. An inhnek hnuah hian Wilder chuan a chak loh chhanah thil chi hrang hrang a puh a, a bulpui berah chuan boxing ring pan laia a inthuamna rit lutuk kha niin a sawi a ni.

Deontay Wilder chuan WBC title a humhim theih loh chhan bulpui pakhat chu Black History Month puala a inthuamna rit lutuk kha puhin, kha inthuamna kha a rih em avangin a ke pawhin a zo lo niin a sawi chhuak.

Gypsy King chuan Bronze Bomber thil sawi chu a pawm lo hle a, chutih rualin chak loh avanga chhuanlam siam chu thil nih dan phung pangngai a nih thu a sawi a ni.

Fury chuan, “Eng thilah pawh a chak lo zawk hi chuan chhuanlam hi an ngah duh hrim hrim a, camp lampang thiam loh te a ni duh a, trainer thiam loh te a ni duh a, thawmhnaw vang te leh kezungpui vang te pawh a ni ang,” a ti.

“Boxer leh fighter reng reng an chak loh hian thil dik lo a awm vang a ni duh hle a. Tu thiam loh emaw ber a ni thin a, an chak loh chhan chu eng emaw tha tak a awm ngei ngei,” a ti bawk.

A sawi zelnaah, “Chak loh chhanah hian an that tawk loh avang leh an hmaa ding chu anmahni aiin an tha zawk a ni tih hi tu mah hian an pawm thei ngai lo hle a. Wilder-a’n chhuanlam a siam vak mai pawh kha ka hrethiam hle a ni,” a ti.

“Kei hi inhliam chungin emaw inhnek ni ta ila, chak lo ila, ka chak lohna chu ka pawm thlap ang a. Ka tha tawk lo a, a lehpekah chuan a hma aia tha zawkin chet ka tum mai dawn a ni,” tiin Fury chuan a sawi.

Kumin chhung hian a vawi thumna atan Tyson Fury leh Deontay Wilder te chu an inhnek leh hmel hle a, kumin kum tawp lamah WBC title hi anni pahnih hian an inchuh leh ngei a rinawm hle a ni.